No.3615/2021-2022
Aizawl, the 10th January, 2022: Champhai District chhunga kum 15-18 inkarte Covid-19 hridanna pek bultanna leh Health Care Worker, Frontline Worker, Kum 60 chunglam leh natna benvawn neite hnena Precaution Dose pek tur chu vawiin chawhma dar 10 khan Kahrawt Community Hall-ah Khuallian Pu Henry C.Lalrawnkima, Addl. DC Champhai chuan a hawng. Hemi hnu hian kum 15-18 inkarte hnenah Covid-19 vaccine (Covaxin) pek chhuah bultan nghal a ni a, ruahman dan chuan kar leh atang hian Health Care Worker, Frontline Worker, kum 60 chunglam leh natna benvawn neite hnenah Precaution Dose pek chhuah tum a ni.

Khuallian Pu Henry C.Lalrawnkima chuan hripui vanga khawvel pum a buai mek laia hri insiamdanglam a rawn chhuah leh mek zel thu tarlangin, hripui len tan atanga hun reilote chhungin vaccine siam chhuah a ni a, hei hian hri dona kawngah awmzia thui tak a neih phah a, hripui vanga tawrhna leh thihna thleng tam zawk chu hridanna lak loh vang a ni, a ti a. Pathianin mihringte kaltlanga hridanna min pe chu vanneihthlak a tih thu sawiin, vaccine chu hri kai lohna tur ni lovin hriin nghawng nasa zawk a thlen tur venna leh thawkna lo tura siamtu a nih thu a sawi bawk.

Addl. DC Champhai chuan sawi chhunzawmin, hripui vanga buai laiin mipuite him nana thawktu hrang hrangten ngawrh taka hma an lak thu sawiin, mipuite chu tha taka thlawp tlat thin turin a chah a. Hotuten kan himna tura hma an lak mek karah mipuiin kan tihtur tha taka kan hlen ve a ngai a, Sawkar thuchhuak leh programme-te tha taka zawm chu khua leh tui tha nihna kawnga tih makmawh a nih thu a sawi a. Kalkhawmte chu Covid-19 kaihhnawih hrang hrang hriattur tulahte mithiam zawkte thusawi ngaipawimawh fo tur leh thu belhchian dawllo ring lo tura chahin, hotute leh mithiamte thu awih turin a sawm a. Vaccine la thei tura tihte chu vaccine lak chu mahni leh midangte tana tangkai a ni tih hria a, lak theuh tum turin a fuih a. Champhai District chhunga kum 15-18 inkar hridanna la thar turte, Precaution dose la thei tur Health Care Worker, Frontline Worker, kum 60 chunglam leh natna benvawn nei ten hlawhtling taka hridanna an lak theih nana duhsakna hlanin a hawng a ni.

He hun kaihruaitu CMO Champhai, Dr. R. Lianmawia chuan kalkhawmte lawmna thu a sawi a. Vaccine pek pangngai chu kalpui reng a nih thu sawiin, kum 15-18 inkarte hnenah a vawi khat nan Sawrkar laipui duanin January ni 3, 2022 atanga vaccine pek chhuah tan a nih thu leh, Champhai District chhungah vawiin atanga kalpui tan a nih thu a sawi a. Health Care Worker, Frontline Worker, kum 60 chunglam leh natna benvawn neite tana precaution dose pek tur chu vaccine lak hnuhnung ber atanga thla 9 (ni 270) hnuah lak theih a nih thu a sawi bawk.

Champhai District chhunga kum 15-18 inkar mi 4,412 te hnenah Covid-19 hridanna Covaxin tunkar chhung hian pek chhuah hman tum a ni a. Vawiin bikah hian vaccine pekna hmun ruat session site 10 (Kahrawt Community Hall, Kanan veng Community Hall, Bethel Community Hall, Govt. Hmunhmeltha Primary School, Zote Community Hall, Tlangsam Community Hall, Vanhnuailiana Hall Ruantlang, Bulfekzawl Community Hall, Hruaikawn Community Hall leh New Hruaikawn Community Hall) ahte vaccine pek chhuah a ni a. Vaccine pekna hmun session site hi Champhai khawpui chhung leh District hmun dangahte a remchan dan ang zela ruahman a ni.