Zanin  tlai dar 5 khan Member of Parliament (Lok Sabha) 2019 thlanna  Champhai District-a neih chu buaina lian tham awm loin tluang taka zawh fel a ni. Vawiin Champhai District inthlan hi ECI ruat General Observer Pu Bidol Tayeng, IAS chuan thlithlai rengin  Polling Station-te kalchilhin  vote thlak a  enfiah a ni.

Vawiina vote thlak atanga a landanin Champhai District Assembly Constituency panga awm atanga vote tla zat chu za zela 61.34 a ni a, 23-Champhai North Assembly Constituency-ah vote tla tha berin, vote za zela 62.45 a tla a. 22-Tuichang Assembly Constituency-ah za zela 61.69,   24-Champhai South ah 61.50, 25-East Tuipui Assembly Constituency-ah za zela  60.90 leh 21-Lengteng A/C ah za zela 60.18 a tla a ni.

Inthlanna a duty,  khawl leh bungrua lo let te hi DC Office-ah  tha taka lo dawnsawn an ni a, 21-Lengteng (ST) A/C atanga lo thlengte General Room Part 1 ah dawnsawn niin EVM khawlte Strong Room No. 3 (Opposite) General Branch-ah dahluh a ni a. 22-Tuichang (ST) A/C te Election Room No. 2 ah lo dawnsan niin EVM khawlte Main Strong Room Part 1 ah dah luh a ni a. 23-Champhai North atanga lo let te General Room Part 2 ah lo dawnsawn niin, EVM khawlte E-District  Strong Room-ah dah an ni. 24-Champhai South A/C a duty-te DC Garage-ah  lo hmuah  an ni a, EVM lo lette Main Strong Room Part 2 ah dah a ni. 25-East Tuipuia  duty lo lette DEOC Building -a hnuah niin  EVM te chu  Strong Room No 2 (Near Election Branch) ah dah luh an ni  a. EVM vote thlak tawhna te hi venhimna khauh tak hnuaiah dah that a ni.

Vawiin inthlanna a vote tla zat te hi darkar hnih bi dan zelah Polling station tin ten vote tla zat report-na  tur Pollstar ti a  vuah  hmangin  an pe  zel a. District Control Centre atana ruat DC Conference Hall. atangin Polling Station tin atanga report dawn te ECI lamah thawn thlak ve leh zel a ni.

MP (Lok Sabha) inthlanah hian Champhai District-ah General Voter 86426 awmin heng zinga 43685 hi hmeichhia niin 42741 chu Mipa an ni a, Mipa Vote aia Hmeichhe Vote tam zawkna hi 944 a ni. Service Voter 715 awm zinga 713 te hi Mipa niin 4 dangte chu hmeichhia an ni. District chhungah  Polling Station 137 awmin, Polling Station 1 ah voter 631 awm zel ang a ni a. Pianphunga rualbanlo vote nei mi 563 an awm bawk a ni. Critical Polling Station a awm lo a, District chhunga Assembly Constituency 5 ah te Hmeichhe hlang duty-na tur Dingdi Polling Station ti a vuah 14 a awm a, Polling Station thlan bik 10 ah te vote thlaklai thlithlai tura thlalakna vuah tum a ni bawk. Rualbanlo/Vohbik leh kum 80 chuang te vote thlak kalna leh hawna ngaihtuah sak an ni bawk.