Serchhip District chhunga Assembly Constituency pathumah Election Commission of Iindia-in inthlan hun chhung atana a ruahman ah (7am to 5pm) tluanga takin vote thlak a ni a. Inthlan hun bi khar anih hnuah vote thlak tura intlar te vote thlak chunzawm tir zel an ni bawk.

Serchhip Districta Assembly Constituency 3 ah hian Polling Station 77 awmin, 26^th Serchhip AC ah hian Polling Station 23 a awm a, Voters 18306 awmah 11841 in vote an thlak a, za zelah 64.48 a tla a. 27^th Tuikum AC ah PollingStation 29 awmin, Voters 15808 atangin 10422 in vote an thlak  a, za zelah 65.93 a tla a, 28^th Hrangturzo AC ah Polling Station 25 awmin, Voters 15782 an awm a, 9629 in vote thlakin, za zela 61.01 in vote an thlak a. Serchhip District pumpuiah Voter 49896 awmin, mi 31892 in vote an thlak a, Vote tla hi za zelah 63.92 a ni.

District chhung Polling Station-77 zingah hian Web Casting Polling Station 10 leh Hmeichhe hlang  duty na bik Dingdi Polling station 8 siam niin, Polling Official mi 420 ruatchhuah an ni bawk. Serchhip District chhungah hian Critical leh Vulnerable Polling Station a awm lova, District chhungah pianphunga rualbanlo (PwD) mi 146 an awm a ni.

Vawiin hian Sector Officer leh EVM Technician ten Polling Station hrang hrang an vil kual reng a, Polling Booth thenkhata EVM thlak ngai awm zeuh tih loh chu harsatna thleng a awm lova, tluang taka inthlanna neih niin vawiin tlai vek hian Polling Party te hian Serchhip District Election Office an pankhawm leh nghal a ni.