2622/2023-2024

Champhai the 3rd November, 2023 - Mizoramin inthlanpui a hmachhawn mekah Champhai District chhunga A/C pathuma Polling Personel te tan vawiin khan a tum thumna turin training buatsaih a ni.

Government Champhai College-a training buatsaih hi Pu Benjamin Zalawma Ralte, Election Officer chuan a kaihruai a, hun hmanpuitu Champhai District Election Officer Pu James Lalrinchhana, District Bawrhsap ni bawk chuan mipuite'n zalen leh dik taka vote an thlak theihna turin Polling personnel-te chu hlauh bik nei lo a, an nihna leh an thuneihnate hrechianga huaisen taka an chanpualte hlen chhuak theuh turin a chah a. Inthlannaa duty turte chu ruihhlo laka inthiarfihlim tura chahin ruihhloa fihlim lo chung duty-te chu an chungah na taka hremna lekkawh a nih tur thu a sawi bawk. District Election Officer chuan Democracy hlutzia sawiin ram thenawm Myanmar-ah mipuiin mipui rorelna an duh ve avangin indona leh buaina nasa tak a chhuak a, India ramah chuan mipuiin zalen takin an duhzawng roreltu an thlang thei chu mipuite vanneihna a nih thu a sawi bawk.

Pu M Misael-a Dy. DEO pawhin thu sawiin kalkhawmte an thawhna department-a hnathawk tha thlan chhuah an nih avangin sorkar pawhin a ring tawk tih sawiin an mawhphurhna chu phurrita la lo a, tha tho leh phur taka thawk turin a chah a; Pu Lalrinawma RO pawhin mawhphurhna an koa tlate chu hlenchhuak ngei tura beisei an nih thu a sawi ve bawk.

Vawiin training-ah hian Pu Vabeimozachhi Chozah, Pu N Lalzarzova, Pu Moses Lalfakawma leh Dr. Vanlalnunpuii Ralte-te'n kalkhawmte an zirtir a, vawiin hian election officials hmun danga vote nei Champhai district-a awm mekte tan vote thlakna hun hawn a ni bawk.

Champhai District-ah Polling Station hi a zavaiin 84 awmin, 23-Champhai North ah 30, 24-Champhai South ah 25 leh 25-East Tuipui ah 29 a awm a ni.Polling Station 84 a duty tur hian Polling Officials mi 452 ruat an ni.