2621/2023-2024

Khawzawl, the 3^rd November, 2023 : Vawiin khan Khawzawl District Election Officer Pu K. Lalrohlua Khawzawl Bawrhsap ni bawk chuan a Office Chamber-ah Khawzawl a thuthar thehdarhtute kawmna hun a hmang a. November ni 7-a Mizoram Inthlanpui neih tura Khawzawl inbuatsaihna hrang hrang te sawiin, inkawmna hun hlawkthlak tak hman a ni. DEO hian thuthar thehdarhtute hi Inthlannia Polling Station a luh phalna Lehkha – Authority Letter a hlan nghal bawk.

1. Home Voting and Postal Ballot:

i. 22-Tuichang (ST) A/C huamchhungah Home Voting Facility hmanga vote thlak thei  kum upa (Kum 80 chung lam) leh vohbik (PwD) mi 112 an awm a. October ni 30 khan Polling Party 6-in an inah kalchilhin vote an thlak tir a, vote 109 a tla a ni. Vawiin ni 3.11.2023 hian vote la thlak lo mi pahnih – Khawzawl leh Sialhawk a mi te vote thlak tir turin Polling Party ten an chenna inah an kal chilh leh ang, Home Voting dil zinga pakhat senior citizen erawh vote thlak hma hian a boral hlauh mai a ni.

ii. Khawzawl DC Facilitation Center-ah hian Tuichang biala vote nei mi 449 in Postal Ballot hmangin vote an thlak dawn a; Mizoram bial danga vote nei mi 355 in vote an thlak bawk ang. A vaiin mi 804 in Postal Ballot hmangin vote an thlak dawn a ni. Tunkar chhungin Postal Ballot hi thlak niin, November ni 4 hian a hnuhnung berah Polling Party ten vote an thlak ve ang.

iii. October ni 31 leh November ni 1 khan Tuichang bial chhunga Vote nei 2^nd IR Batallion, SP Office, DC Office, Motor man (requisition) driver te tan Facilitation Center – DC Conference Hall-ah  Postal Ballot hmanga Vote thlakna hun hawn a ni. October ni 31 khan Vote 119 a tla a, November ni 1 khan vote 23 a tla thung. Vote tla zawng zawng hi vote 142 a ni.

iv. Tuichang Bial pawn mi Inthlan kaihhnawiha mawhphurhna nei te leh Essential Service Voter te chuan nimin November ni 2 khan vote an thlak a.  He hunah hian Vote 108 a tla a, Postal Ballot kaltlanga vote tla tawh zat hi (2/11/2023 tlai dar 3:00) vote 250 a ni. Postal Ballot hmanga Vote thlak hi vawiinah la thlak ve lo te (bial pawn leh bial chhung) tan kalpui chhunzawm mek zel a ni bawk.

2. Silent Period:

i. Representation of the People Act, 1951 section 126 chuan Constituency- a vote thlak hun tawp atanga chhiar leta darkar 48 (i.e. ni 5 November, 2023 tlai dar 4 pm) atangin Television (TV) emaw hmanraw dang hmanga inthlan kaihnawih thil tarlan leh tihchhuah a khap tlat a ni.

ii. He darkar 48 chhung hian Inthlan kaihhnawih thila vantlang inkhawm khap tlat a ni a, mi tumahin inthlan kaihnawih thil television-ah emaw cinema-ah emaw media dangah emaw mipui hmuh theih turin an phochhuak tur a ni lo. He thupek zawm lo te chu kum hnih thleng lungin tan tir emaw lei chawi tir emaw, a pahniha hrem theih an ni.

iii. Silent Period ni 5 November, 2023 tlai dar 4 pm hman anih atangin Campaign period a tawp a. Silent Period hman anih hnu ah 22-Tuichang (ST) A/C huamchhunga Vote nei te chauh awm phal an ni tawh a ni.

He hun, Silent Period hi ni 5 November, 2023 tlai dar 4 pm atanga inthlan zawh, ni 7 November, 2023 tlai dar 4 pm chhung hian Khawzawl District-ah pawh khauh taka kalpui tum a ni a. Hlawhtling taka kalpui a nih theih nan in mi tanpuina ka dil e.

Inthlanna muanawm neih a nih theih na DC/DEO chuan CrPC Section 144-na hmangin inthlanna hmun (Polling Station) tih loh ah mipui panga aia tam punkhawm a khap a, Election kaihhnawih ni lo aurinna hmanga puan a khap bawk.

3. MPF Leh YMA te nena thawhhona: 22-Tuichang Bialah Vote tla a that theihnan Khawzawl District Election Office chuan theihtawp a chhuah a. Sub Hqrs YMA leh MPF te nen thawhona tur ruahman a ni.

4. Expenditure Observer hova expenditure endik hun sawn: Pu Shridar Dora hova Candidate te account endik tumthumna November ni 4, 2023 chawhma dar 10:00 a neih tura ruahman tawh chu November ni 4, chawhnu dar 04:30 ah sawn a ni.

5. Last 72 Hours: Vawiin hian Vote thlak tawp hma darkar 72 chhunga dan leh thupek kalpui dan tur relin General Observer, Expenditure Observer, Police Observer, DC leh SP te hovin inthlan kaihhnawiha mawhphurhna nei te an thukhawm.

Lawmthu sawina leh ngenna: Khawzawl District chhunga thuthar thehdarhtu ten inthlan hmasa ber kan hmachhawn tura min puihna zawng zawng hi ropui kan ti a, kan lawm em em a ni. Inthlan muanawm, felfai, thianghlim leh voter turnout a that theih nan hun tlemte la awm ah hian tan min lak pui zel ula. In zavaiin duhsakna sang ber ka hlan a che u.