2620/2023-2024
Dated Serchhip, the 3rd November, 2023: Tun hnaiah whatsapp group pahnih- THUPUI SAWI HONA leh Mizoram Draught Association tih group-ah mi tu emawin Serchhip Assembly Constituency-a Postal Ballot hmanga vote tlak dan leh candidate te vote hmuh tawh dan tih thu phuahchawp a post a. Hei hi Serchhip DEO Pu David Lalthantluanga chuan thu dik lo, phuahchawp “fake news” a ni tih mipuite a hriattir a. Fake news thehdarh hi ECI chuan a khap tlat a, hetiang thil titu chungah hian Serchhip District Election office chuan dan angin hma a la mek a ni. Hetiang thil hi a thlen tawh loh nan fimkhur turin DEO chuan mipuite a hriattir a ni.
India ram, democracy ramah hian Election Commission of India chuan inthlanna fel fai leh dik a awm theih nan nasa takin hma a la a. Vote chhiar a nih hmaa vote hmuh dan lo hriat lawk hi thil theih loh hulhual a ni a. Tu te pawhin zalen taka an mi duh te an thlan theihna turin “Secrecy of Voting” hi khauh takin Election Commission of India chuan a kalpui tih DEO chuan mipuite a hriattir nawn leh a ni. Home Voting leh Postal Ballot hmanga vote thlak te reng reng hi candidate aiawh ten vote thlak lai an enpui mai bakah ballot paper dahna strong room hawn leh tihfel pawh candidate agent te hmuh laia tih vek a ni a. Tu emaw ina vote tlak dan lo hriat hi thil theih loh hul hual a ni. Ballot paper te hi Armed security venna hnuaiah strong room ah dah a ni a, vote chhiar ni counting day ah phawrh a ni chauh ang. Ballot Paper dahna hmun him leh him loh en duh tan DC Office strong room leh a velte a duh apiangin thlithlai theih reng a ni.
