481/2026-2027 

Champhai, May 12, 2026: Vawiin khan Education Training Hall, Kahrawt Veng-ah Champhai District chhunga zirna tihhmasawnna tura ruahman, Project LEAD (Literacy & Education Advancement in District Champhai) chungchang zirhona ‘Consultation Workshop’ neih a ni a, Pi K. Lalsiamliani, District Education Officer (DEO), Champhai-in a kaihruai a ni.

He hunah hian Champhai Bawrhsap Pu Mohammad Aaquib chuan kalkhawmte lawmna thu sawiin, zirna hmasawnna tura hetiang ruahman thar a awm chu lawmawm a tih thu a sawi a. District chhunga zirna dinhmun siamtha turin zirtirtute leh thuneitute'n lungrual taka hma lak a pawimawh thu a tarlang bawk. Zirtirtu lo kal te chuan workshop hlawkthlak taka hmang a, zirlaite hmakhua ngai chunga zirna lungphum dik phum tura an ngaihtuahna te seng turin a chah a ni.

Pu Lalchhuanawma Ralte, SDC, Champhai chuan 'Project LEAD' kalphung leh a tum (objectives) sawifiahna hun a hmang a. Pu Bijoy Sankar Das, Head-North Eastern States, Azim Premji Foundation chuan workshop-a thupui ber (highlights) te tarlangin, he project hnuaia hma lakna tur chi hrang hrang a tarlang bawk. Pu Lalthlamuana Tochhawng, SDEO, Champhai chuan lawmthu sawiin a hun khar a ni.

Project LEAD hi DIET Champhai leh District Education Office te tangkawpin mawhphurhna lain an kalpui dawn a, PARAKH Rashtriya Sarvekshan 2024-in a tarlan zirlaite thiamna tlakhniamna (learning gaps) te sukiang a, zirna hnar (foundational learning) tihchak a tum ber a ni a. Primary School-ah Naupangte'n chhiar leh ziah leh chhiarkawpah te hmasawnna an neih theihna turin 'Foundational Literacy and Numeracy (FLN)' kalpui te, Middle School-ah Science leh Maths kit-sem te, zirlaite kut ngeia experiment an tih theih nan hma lak te, High School-ah High school 39-ah supplementary science kits sem a , zirtirtute thiamna chherhriam tura training te hi a thiltum ber chu a ni.

Workshop-ah hian Champhai Block leh Khawbung Block huam chhunga zirtirtute an tel a ni.