AH & Vety Department bultumin Vawk natna chi khat  African  Swine  Fever (ASF) chungchanga mipuite hnena zirtirna chu Champhai District-ah neih chhunzawm zel niin, vawiin lam khan Myanmar ram ri hrula khaw awm pahnih Hnahlan leh Zokhawtharah te Awareness Campaign hi neih chhunzawm leh a ni.

Zokhawthar a inzirtirna hun hi  Dr M. Zohmingthangi, DVO Champhai chuan a kaihruai a. Dr. Saihlira, Addl Director, AH&Vety Department chuan African Swine Fever  laka  fimkhur a tulna leh  he Vawk natna hlauhawm takin Mizoram a lo luh lohna tur atana  tanrual angaih takzet thu sawiin, a ven leh do zelna kawngah Sawrkar tawiawm tlat thin turin khawtlang mipuite a ngen a. African Swine Fever chungchanga hriattur pawimawh leh tulte Dr C. Neihthangpuiin a zirtir a ni.

Vawiin vek khan Information Building, Hnahlanah pawh African Swine Fever chungchanga inzirtirna hun hi neih a ni a. He hun Dr T. C. Lalthanzauva, VO Champhai kaihhruaiah hian Dr K. Lalrohlua, Dy. Director AH & Vety Department leh Pu K.Khawremsiama, VCP Hnahlan ten thu an sawi a. Dr. Lalrinhlui, V.O Ruantlangin zirtirna pein zawhna leh chhanna hun hman a ni a. Dr. Vanlalhmangaihzuala, VO Hnahlanin lawmthu sawiin hun a khar a ni.

African Swine Fever hi Vawk pul hri niin DNA Virus chi khat Asfivirus thlen a ni a,  Vawk leh Sanghal chi ten veiin, mihringah he natna hi kaichhawn ve theih ani lo a. A hmasa ber turin kum 1921-ah Africa khawmualpuia Kenya-ah hmuh chhuah a ni a, Asia khawmualpuiah chuan kum 2018 August thla khan Chinaah hmuh chhuah a ni.  April Ni 25, 2019 thleng khan Asia chhim chhak  kan thenawm mai Myanmar ramri hrula awm Laos, Thailand, Cambodia leh Vietnam-ah te he Vawk natna hi hmuchuuah ve leh a ni a. Mizoramin vawk kan lakluhna ber pakhat Myanmar ramah he natna hi lut thei reng a nih tawh avangin fimkhur angai a, Myanmar-ah hian a lut a nih chuan rei loteah Mizoram lo thleng mai thei anih tih hriain, a lo invenlawkna turin mipuite zirtirna hun hi AH&Vety Department chuan a nei mek a ni.  He Vawk pul hri Vawk tam tak suattu African Swine Fever hi tihdamna damdawi leh Vaccine la awm rih lo anih avangin kan inven theih dan awm chhun chu ram dang atanga Vawk leh Vawksa atanga siam reng renngte lakluh loh hi a ni.