581/2024-2025

Champhai, the 28th May, 2024: Vawiin chawhnu dar 1:30 khan Champhai District AIDS Prevention and Control Committee chu an Chairman Pu James Lalrinchhana, District Bawrhsap hovin DC Conference Hall-ah an thukhawm.

District Bawrhsap Pu James Lalrinchhana chuan tun hma atanga HIV/AIDS dona kalpui chuan rah tha a chhuah thu leh hmalaknate a thlawn maia a kal loh thu a sawi a. Champhai District chu ramri dep ruihhlo tawlhrukna kawng a nih avangin ruihhlo engemawzat thlauh a nih thu tarlangin, thawhhona tha tak hnuaiah ruihhlo chak taka do niin thahnem tak man a ni tiin, ruihhlo do hian HIV/AIDS dona kawngah awmze thui tak a nei tel a ni, a ti a. Ram leh hnam hmelma, thalaite nun tichhe mektu HIV/AIDS do kawngah tha thlah a thiang loh thu a sawi bawk.

He hunah hian Pi Zuiliani Hrahsel, Jt. Director (IEC), MSACS-in powerpoint presentation hmangin HID do kawnga hmalak ngaihna leh hmalak dan turte a sawifiah a. National AIDS Control Organization (NACO), 2022 tarlan danin Champhai District mipui za zela 2.97 (1664) te'n HIV an vei thu a tarlang a. Mizoramah a tlangpuiin damdawi khawih leh mipat hmeichhiatna hman khawlohna atanga HIV kai an tam ber thu sawiin, tunhma HIV kai thinte chauh ni tawh lovin mipui mimirah a lut nasa tawh a, hei vang hian inkaichhawn theihna lakah kan fimkhur tlan a ngai hle a ni, a ti a. Invenna tura pawimawhte hriat a tul thu sawiin, a veite tan inhriatchhuah hma leh tha taka inenkawlna  lak a tul a, hemi avang hian HIV kaihhnawih natna tam tak a pumpelh theih a ni, a ti bawk.

He hunah hian District AIDS Prevention and Control Committe (DAPCC) kaltlanga HIV/AIDS chungchang inzirtirna tun aia changtlung zawka kalpui dan turte ngaihtuahho a ni a. Champhai District huamchhungah HIV a darh zel loh nan leh a vei mek te'n inenkawlna tha an dawn theih nan 'Zoram Harh Rawh Campaign' kaltlanga HIV/AIDS Awareness Campaign kumin June-October thla chhunga kalpui dan turte rel a ni a. Thukhawm chuan Champhai District chhunga khaw hrang hrang 67 leh Zirna Inahte HIV/AIDS Awareness Campaign neih a, uluk taka vil zui nise an ti a. Mipui zirtir nan khawlai hmuh theih remchangah ualau takin inzirtirna lam hawi tam zawk pholan nise tih a ni bawk a. Heng bakah District Community Resource Group (District-CRG) din dan tur leh pawimawh dangte sawiho a ni bawk.