580/2024-2025

Aizawl the 28th May, 2024: Vawiin ni 28th May, 2024 chawhnu dar 3:00 khan Power Minister Pu F. Rodingliana chuan Mizoram hmun hrang hranga kawlphetha pekna Cyclone Remal-in a tihchhiatte chak taka siamthat hna thawh zel theih nan Department hotute emergency meeting a neihpui a. Aizawl khawchhunga khawl leh line chhe tam tak chu tukin zing aṭang khan ruahsur leh leimin karah siam ṭhat hna thawh nghal niin, hmun ṭhenkhat erawh leimin leh ruah sur nasat avanga siam mai harsa awm mahse Department staff ten theihtawpin hna an thawk mek a ni.

Cyclone Remal vang hian tun dinhmuna report dawn danin Aizawl-ah ringawt pawh Feeder 33 zet chawmtu Power Sub-station hmun 10 lai chhiat avangin veng 60 chuang eng nei lovin an awm a, transformer dahna minin transformer a minpui tel te leh panel board engemaw zat chhia report dawn a ni bawk. Aizawl khawpui chhung bakah Mizoram hmun hrang hrang atanga report dawn danin Mamit District ah electric ban leh 33kV line leh 11kV line chhia te, Kolasib District ah 132kV, 33kV leh 11kV engemaw zat chhia te a awm a, meeting huaihawt nih lai thleng hian Mizoram chhim lama District 3 Lunglei, Lawngtlai leh Siaha te eng pek theih a la ni lo. Chhim lam line pek Serchhip District erawh Siatual (via East Lungdar) atangin power pek tawh niin, hmun dang pawh hetiang hian a theih dan ang anga hma lak zel tum a ni.

Minister chuan hmanrua indaihlo te hmun hrang hrang atanga lak khawm dan ngaihtuah a, a tul anga RDSS scheme atang te pawha hmanrua lo pawh a, a rang lama siamthat hna thawh chhunzawm nan hian sum te pawh a awm ang ang zawn nghal ni se a ti a. Hei bakah hianin LT leh HT line chhia hmun tam takah a awm avangin sum awm lo chung pawh a tihdan kawng zawn zel a ni ang a ti. P&E Dept. thawktuten ruahsur karah pawh mahni nunna tana hlauhawm khawpa an thawhnaah lawmthu a sawi a, Department lamin theihtawp chhuaha chawl lova hna an thawh thu hre reng chungin, mipuite pawhin dawhthei taka hrethiam turin a ngen a ni.

Customer Care Centre (CCC) tangkai zawka hman dan tur rel nghal niin, vawiin meeting hi Pu H. Zonunsanga, Engineer-in-Chief, P&E Dept., leh P&E Dept. official dang te nen Power Minister Pu F. Rodingliana chenna inah neih a ni.