No.2385/2020-2020

Dated Champhai, the 24rd June,2020 (Wednesday): Vawiin khan Champhai district mi leh sa Covid-19 vei pariat zinga pali (mipa 3 leh hmeichhia 1) te chuan dam taka Recovery Ward, Designated Covid Health Centre (DCHC), Nursing School Building chhuasanin mahni in lam an pan. Tun thlengin Champhai district-ah Covid-19 vei mi 8 awm tawhin, an zinga 4 te chu vawiin khan Discharge Card hlan niin, dam takin DCHC an chhuahsan fel a. Mi pali dang Mipa 3 leh Hmeichhia 1 te enkawl mek niin, tumah ngaihtuahawm an awm lo a ni.

Thlahna hun tawi Nursing School Building Ground Floor-a neihah Dr. R.Lianmawia, CMO Champhai chuan district hrang hrang zinga Covid-19 natna vei damchhuak rang ber kan nei thei chuan Treatment Team-te thawhrim leh thatzia a lantir a, thawhhona tha vanga tun hun thleng thei hi kan ni, a ti a. Damna petu Pathian hnena lawmthu sawi mawlh mawlh tura chahin, fimkhur chhunzawm zela chhungte nena hun hlimawm tak hmang theuh turin duhsakna a hlan a ni.

Thusawitu dang Dr. Zatluanga, DMS Champhai chuan district inpuahchahna sawiin, thawhhona tha tak hnuaia mahni mawhphurhna theuhte hlen ani chu lawmawm tiin, Covid-19 vei hmuhchhuahte pawh hmun dang panpui ngai lova Champhai hmuna tha leh uluk taka enkawl an ni chuan inbuatsaihna leh thawhhona thatzia a entir a ni, a ti bawk.

Dr. J.Lalramchhuanga, Senior Specialist & Leader, Covid-19 Treatment Team chuan he hun hi kaihruaiin report tawi a pe a. Delhi atanga lo haw ten June Ni 1,2020 a Champhai an lo thlen thu leh June Ni 3 a sample lak sak June Ni 7 a chhuakah mi 103 zinga 5 ten Covid-19 an positive thu a sawi a. A tuk June Ni 8 zing dar 3 bawrah DCHC ah dahluha Doctor thiam kaihhruai Medical Team ten an vil chawt thu a sawi a. June Ni 17 a sample laknawn leh enfiahah panga zinga palite an negative thu sawiin, la vei mekte chu ngaihtuah awm an nih loh thu leh dam thuai thuai tura an duhsak thu a tarlang a. Dam tate chu Ni 7 chhung inlama tawmim tur leh harsatna neih pawha biakpawh theihna number pekah be vat turin a chah a. Treatment Team Leader chuan Doctor thiam kaihhruaiin riahchilha theihtawp an chhuah thu sawiin, natna veite pawh thu awih tak leh phunnawi lova an awm thin avangin a fak a. Hripui leng a la reh loh vangin fimkhur chhunzawm zel turin a chah a ni.

He hunah hian mahni inlama haw mai tawh tur Covid-19 vei damtate chuan hmangaih taka enkawla buaipuitu Treatment Team leh sawrkar chungah lawmthu sawiin, an mahni hnema chawk hlim thei tur mamawh leh hmanraw hrang hrang phal taka petute chungah thinlung takin lawmthu an sawi a ni.

Champhai district mi leh sa, Delhi atanga haw runpui zinga Covid-19 positive 5 te sample hi June Ni 17 khan laknawn niin, June Ni 20 khan an zinga palite Covid-19 an negative tih puan a ni a. Fimkhur thuhlaah Recovery Ward, Designated Covid Health Centre (DCHC), Nursing School Building-ah dahluh niin vawiin khan dam takin an mahni inlamah haw tir an ni. Positive dang 4 te sample pawh endik tura thawn niin, ngaihchan mek a ni.

Vawiin vek khan Delhi atanga lo haw mi 86 (Mipa 26 leh Hmeichhia 60), Tlangsam Polytechnic Institutional Quarantine Centre-a awmte chuan dam takin mahni in lam an pan hlawm a, an ni hi RT-PCR Test tum hnih paltlang Quarantine Centre-a ni 23 awm tawhte an ni. Delhi atanga haw runpui hmanga June Ni 1,2020 a Champhai lo thlengte niin, Sample lak hmasak ber June Ni 3 ah khan an zinga mi 5 an positive avangin sample laknawn sak leh phawt hnuah negative tih finfiah niin, vawiin khan mahni in lam theuh panin an haw a ni.

Vawiin Tlangsam Polytechnic Institutional Quarantine Centre chhuahsante hian an haw hmain an awmna theuhte senghawiin, tihfai leh sukfai ngaite an thawh zawh hnuah chauh Quarantine Centre hi an chhuahsan fel a ni. Pathianni vawi hnih inkhawm atanga an thawhlawm tlingkhawm chu tanpui ngaite pualin an hlan nghal bawk a ni.

Tun dinhmunah Champhai district atanga RT-PCR Test sample thawn tawh zat chu 727niin, result hriat tawh 704 leh ngaihchan mek 23 a awm a ni.