689/2024-2025

Champhai, the 6th June, 2024: Vawiin chawhnu dar 1:00 khan Champhai District chhunga veng/khua 67 te tuamchhuaka Children's Films Exhibition kalpui dan tur District Bawrhsap Pu James Lalrinchhana hovin DC Conference Hall-ah sawiho a ni.

He hun kaihruaitu Pu James Lalrinchhana chuan Ministry of Information & Broadcasting (I&B) hnuaia North East State 7 a kalpui tur, Children's Films Exhibition hnuaiah Mizoram atangin Champhai District thlan a ni chu lawmawm a tih thu sawiin, hei hian nakin zela khawtlang innghahna ni mai tur naupangte thanlen leh nunkawng zawh zelna turah zirtirna pein rah tha a chhuah ngei a beisei thu a sawi a. Children's Films Exhibition kaltlangin I&B Ministry buatsaih film-te chhuah mai bakah awareness campaign kalpui tel tum a nih thu a sawi a. Champhai District-a Children's Films Exhibition kalpui a nih theih nana hmalak dante a tarlang nghal bawk.

Thusawitu dang Sub-Hqrs. YMA (SYMA) Champhai President Pu F. Lalrinmuana chuan Champhai District Bawrhsap hmalakna kaltlanga Children's Films Exhibition kalpui a ni tur chu lawmawm a tih thu leh phurawm a tih thu a sawi bawk.

Children's Films Exhibition, Champhai District hi Sawrkar laipui Ministry of I&B sum cheng nuai 14 senga kalpui tur a ni a. Champhai District chhunga khua/veng 67 ahte branch YMA  ruahmanna hnuaiah phase 4 a kalpui tum niin, ruahman dan chuan ni 55 chhunga zawhfel hman tum a ni a. Film title 10 awmin, heng zinga 8 te hi Mizo tawnga lehlin a ni. 

Thutkhawmah hian Children's Films Exhibition kalpui nana tul leh pawimawh hrang hrangte sawiho a ni a, inrawnkhawmna hlawkthlak tak hman a ni bawk.