688/2024-2025

Champhai, the 6th June, 2024: Champhai khawpui kianga luang Keilungliah lui khuah  enkawl kawnga mawhphur tura Sawrkarin a din, 'District Level Committee on Post Completion Management & Maintenance of Dam Reservoir cum Recreation Centre at Keilungliah' chu vawiin chawhma dar 11:00 khan an Chairman, Pu James Lalrinchhana, District Bawrhsap hovin DC Conference Hall-ah an thukhawm.

Chairman Pu James Lalrinchhana chuan  Keilungliah tuikhuah chu Champhai tana hmasawnna ruhrel pawimawh tak, khawpui timawitu leh sik leh sa chena thlak danglam theitu a nih thu a sawi a. Mipuiin an hlut thu leh sum leh pai lakluh nana remchang tak a nih thu sawiin, hawnfel a nih hnua cheibawl kawngah line department leh NGO kaltlangin theih ang anga hmalak a ni, a ti a. Keilungliah tuikhuah enkawl kawngah neitu thinlung pu chunga infinchhuah zel a pawimawh thu sawiin, line department hrang hrangte leh khawtlang inkarah thawhhona tha chhawmnun zel a pawimawh thu a sawi bawk.

He hunah hian Member Secretary Er. Z.D Dengthuama, EE, PHED Champhai WATSAN Division-in report a pe a. Keilungliah kama thingphunte a nung dam that thu sawiin, a kama chawlhna in sakte a him zel theih nana neitu thinlung put tlan a tul thu a sawi a. Keilungliah fintu luidung tihfai kawngah thalaite'n theihtawp an chhuah thu tarlangin fakawm a tih thu a sawi a. Keilungliah tuikhuaha tui tling zat chu litre nuai 4000 vel bawr nia chhut a nih thu a sawi bawk.

He hunah hain Keilungliah tuikhuah tihchangtluna cheimawina tur UD&PA kaltlangin cheng nuai 51 dawn beisei a nih thu tarlan a ni a.  Keilungliah tuikhuaha bawlhhlawh lut thinte danchah a nih theih nan leh a kama thingphun turin AMRUT, UD&PA kaltlangin cheng nuai 90 senna tur project thehluh a nih thu tarlan a ni a. MP Fund cheng nuai 10 senga View Tower sak a nih tur thu tarlan a ni bawk a. Tihchangtlunna tur project-in Swadesh Darshan 2.0 Itenary 1 a paltlang tawh thu tarlan a ni bawk.

Meeting-ah hian Hmunhmeltha khawtlang tana Keilungliah tuikhuah atanga tuilak dilna lut chu ngaihtuah a ni a. Keilungliah tuikhuaha tui tling zat water volume leh khawtlang mamawh zat nia hriat zirchiannate sawiho a ni a; tui tling zat leh khawtlang mamawh zat chhutin PHE Department-in Model Project DPR a siam chu hmalak chhunzawm phalsak a ni a. Keilungliah tuikhuah kam, tui tlinna atanga metre 50 chin chu restricted area-a puan a nih thu tarlan a ni a; eng hmanraw hmang mahin sangha man phal a ni loh thu leh ruihhlo khawih nana hman phal a nih loh thu tarlan a ni a. Dan lova thil tihte ven a nih theih nan Police patrolling a khat tawka neih ni se, heng bakah hian member-te pawhin ngaihven tlan ni se tih a ni a. Sangha dah belh ni se tih niin, mipui hnenah zirtirna tam zawk siam ni se tih a ni bawk.

Tuikhuah tlawhtute tana lenkual velna tur Lawngleng (boat) service 4 dah ni se tih niin, man chawia nghakuai chiah kalpui dan tur ngaihtuah a ni bawk a; hemi atana inkaihhruaina siam tur sub-committee din nghal a ni a. Keilungliah leh a chhehvela nungcha leh thingte humhalh tlat a nih avangin committee chuan dan phal loha sangha leh nungcha dang man lo tur leh a kama thingte tichereu lo turin mipuite a chah a; dan lova thil tite chungah a tul anga hmalak a nih tur thu a tarlang bawk.

District Level Committee on Post Completion Management & Maintenance of Dam Reservoir cum Recreation Centre at Keilungliah, Champhai thutkhawmah hian Executive Vice-Chairman Er. Thanchungnunga, SE, PHED Champhai WATSAN Circle leh member dangte an tel a ni.