157/2022-2023
Champhai, the 12th April, 2022: Vawiin chawhnu khan Champhai District Bawrhsap Pu James Lalrinchhana leh Line Department hotute chuan thenawm ram Myanmar tualchhung buaina avanga sahimna zawnga Mizoram pantu raltlante tlawhin an harsatna leh mamawhte an enfiah. Mualkawi rama Sapianmaksak Refugee Camp leh Zokhawthar te tlawhin VC leh NGO hotute Line Department Official-te nen an kawm a. Raltlante awmna refugee camp hrang hrangte tlawhin an enfiah bawk a. Ei leh bar, mei eng, tui, nitin mamawh, zirna, hriselna, sumdawnna hmunhma, security dinhmun leh a dangte zirchian niin, hmalak theih dan turte inrawnkhawmna neia sawiho a ni a. Nakin lawka Indo-Myanmar insumdawntawnna kalpui tur kawnga hmalak tulte an enfiah bawk.

Zokhawthar BNRGSK Hall-a khawtlang hruaitute nena inkawmhona hunah Pu James Lalrinchhana chuan thu sawiin, harsatna leh mamawhte inhriatpuitawn leh a tul anga hmalak dan turte ngaihtuahho a nih theih nana inrawnkhawmna hun buatsaih a nih thu a sawi a. Thenawm ram buai avanga raltlanin engtia rei nge a awh dawn tih hriat a nih loh avangin nakin fur ruahtui tlak leh a nghawng theite kan ngaihtuah tel a tul takzet a ni, a ti a. Raltlante buaipui kawnga YMA, khawtlang mipui, kohhran leh mi inphal tak takte hnathawh chu chhuanawm a tih thu a sawi a. Raltlan chungchang chauh nilo Zokhawthar himna leh hmasawnna rahbi zawh zel dan turte ngaihtuah tel a nih thu sawiin, raltlan hminga lokal kan ram tichhe theite dan hnuaiah nasa taka kan do tlan a ngai a, kan ram leh hnam humhim nan erawh theihtawp kan chhuah tlan a tul takzet a ni, a ti bawk.

Champhai SP Pu Lalrinpuia Varte chuan ramri dep khuaten thiam tak maia raltlan dawnsawn leh buaipui hna an kalpui chu fakawm a tih thu a sawi a. Raltlan zingah naupang engemawzat an tel ve avangin an dikna leh chanvo humhimte, humsual an dai lohna tur leh dan lova thil tih thin laka an fihlim theihna tura zirtirna kan pek tam deuh deuh a tul a, kan ven tlan a ngai a ni, a ti a. Loh theih loha raltlante chu India dan angte tha taka zawm tur leh, bungraw lakluh phallohte la lut lo tura zirtir an pawimawh thu a sawi bawk.

Dr. R. Lianmawia, CMO Champhai chuan hri laka him tlan nan fimkhur chhunzawm zel a tul thu leh, damlo an awm chuan Health Department thawktute hrilhhre zung zung turin a chah a. Kum 12 chunglam ten Covid vaccine an lak vek theih tawh thu leh, vaccine thahnem tak pek tur a awm avangin vaccine lak ngaipawimawha la vek turin a chah a. Kum 2013 August thla atanga kalpui tan cross-border vaccination program kaltlangin ramri kana lokal naupang kum 5 hnuailam mi 3000 chuangte zeng hridanna oral polio vaccine pek an nih tawh thu a sawi bawk a. Hriselna kawnga fimkhur tulna leh invendante a sawifiah bawk.

He hunah hian District Education Officer Pu T.T Laltanpuia'n raltlan naupangte tana zirna kalpui dan tura ruahmanna awmte a sawi a. Pu Vanlalmuanawma, SDO, PHE leh Pu John Lalthlengliana, SDO, P&E leh Pu Vanlalpara, District Marketing Officer ten an department kaltlanga hmalakna leh hriat tul angte an sawi a. SYMA hotute leh khawtlang hruaituten thu an sawi bawk.

Pu Lalmuanpuia, VCP Zokhawthar report danin tun dinhmunah Zokhawtharah hian raltlan 4000 chuang hret, chhungkaw 800 vel an awm mek a ni.

Mualkawi ram Sapianmaksaka raltlante a tlawhnaah hian Bawrhsap leh Official dangte hi Chin Youth Oraganization Champhai (CYOC) hotuten an lo dawngsawng a. He hmunah hian tun dinhmunah raltlan 150, chhungkua 40 bawr vel an awm mek a ni.

DC Office Champhai tarlan danin tun dinhmunah Champhai District-ah raltlan mi 8747an awm mek a, mi 8601 te chanchin kimchang lak fel tawh niin, mi 8588 te hnenah ID Card pekchhuah tawh a ni a. Relief camp 33 awma chhinchhiah niin, Relief camp-ah mi 2434 awmin Relief camp nilo hmun danga awmzat hi mi 6313 an tling bawk a. Raltlante tan dan leh hrai inzirtirna hun buatsaih thin a ni bawk.

District Bawrhsap hi Pu Lalrinpuia Varte, SP; Dr. R.Lianmawia, CMO; Pu T.T Laltanpuia, DEO; Dr. Lallawmkima, DIPRO; Pu Vanlalpara, DMO; Pu Vanlalmuanawma, SDO, PHED leh Pu John Lalthlengliana, SDO, P&E Champhai leh SYMA Champhai hruaituten an tawiawm a ni.