158/2022-2023 

Siaha; the 13th April,2022: Vawiin tlailam dar 4:30Pm khan Circuit House-ah May ni 5 a 12th MADC Election neih tura Observer atana ruat Pu R.Lalremsanga, Hnathial District Bawrhsap nilai hovin party aiawh te leh Siaha MJA  te nen circuit house-ah meeting neih a ni.

He meeting-ah hian thu sawiin, Pu Lalremsanga chuan  12th MADC Election hi election felfai, muanawm leh thianghlim tak a ni theih nan Siaha district mipui mimir kan tan ho a ngai a, Tlawmngai Pawl, MPF, Party workers leh chanchinbu mi ten Election apianga Election official te inlo intawiawm tawh thin angin, tun tumah pawh tha taka District Administration lo tawiawm leh turin Siaha district mipui te ka ngen che u a. Kan Politician leh official te pawhin Model code of conduct zawm hram hram tum i la, kristian te tihawm renga mawiin Election lai hian i awm ang u; tiin, 12th MADC Election hi Autonomous District dang te entawn tlak khawpa felfai leh thianghlima buatsaih turin duhsakna sang ber ka hlan a che u, a ti bawk.

Superintendent of Police Pu VL. Lura Hauzel pawhin thusawina hun hmangin, Siaha district Police Sanctioned strength hi 262 a ni nâ in, tunah hian 129 chauh an awm mek a, Election duty tur police personnel rank hrang hrang 200 vel dil belh mek a ni  a, tunah mi 21 an lo thleng tawh a ni, a ti. Pu Malura chuan Polling Station 81 a awm a, Sensitive area a puan tur  a awm em tih assessment nei mek a ni, a ti. Tum danga  Election  laia Silai khawm thin  leh dar 2 dana vote tlazat report thin te pawh, tun 12th MADC Election-ah chuan  tih a ngai lo mai thei a ni, a ti bawk.