2143/2022-2023

Champhai, the 1st October, 2022:  BADP sum cheng nuai 12, MLA fund cheng nuai 2, mimal leh pawl thahnemngaite thawhkhawm atanga sak, avaia cheng nuai 16.25 senna Bethel Branch MUP In, Champhai Bethel Veng ami chu vawiin chawhma dar 11 khan District Bawrhsap Pu James Lalrinchhana chuan a hawng.  Lawmpuina thilpek pawisafai Rs.5,000/- leh Silpaulin a hlan nghal bawk.

District Bawrhsap Pu James Lalrinchhana chuan khawvel puam huap Upate Ni-a Bethel Branch MUP In tha tak hawn a ni chu inhmeh a tih thu a sawi a. MUP In thar puitlin a nih theih nana thawhhona duhawm tak leh sum leh tha senga luankhawmna atanga hlawhtlinna hmuh a ni chu fakawm a ti a, hei hian tanrualna leh thawhhona hmanga hlawhtlinna a awm theih thu mipuite zirtir se a duhawm hle dawn a ni, a ti a. Kum upate chu an rilru leh ngaihtuahnate tuai thar tur leh tar tum mai lova tunlai thil thleng leh thiamnate ngaihven turin a fuih a. Tawnhriat ngah thangtharte zirlaibu an nih thu hrilhin, an hriatna leh thiamnate chu thamral tir mai lova thangtharte chhawr theih tur, a bik takin hnam zirang bo mai turte humhim leh hlan chhawng kawngah tan la deuh deuh turin a ngen a. An rilru leh taksa tiharh reng turte,  thiamna leh tawnhriat neihte district administration puih nan leh finchhuah nana hmang zel turin a sawm bawk.

Thangtharte chu kum upate ngaihhlut nachang hriaa zah fo tur leh, an hlimpui zawng an tana pawilote ti thei tura zalenna pe thin turin a chah a. Inchhung rorelna-ah hmun pawimawh ber chantir a, thurawn lak nana hman thin a finthlak thu a sawi bawk a. Heng bakah hian Chief Election Commissioner (CEC) hminga upate ni puala lawmpuina thuchah leh kum lama upate, abikin kum 80 chin chunglam vote thlak turte tana Election Commission of India (ECI) in  ruahmanna siam sakte a chhiar chhuak bawk.

Hawnna pual inkhawm Bethel Branch MUP In-a neih hi Pu R.Vanlalvuana, President, Bethel Branch MUP chuan a kaihruai a. Pu K.Zalawma'n hunserh a hmang a. An pawl Secretary Pu C.Lalzova hnen atangin report kimchang ngaihthlak a ni a. He hunah hian MUP District Hqrs. Champhai, Bethel VC, Branch YMA leh Branch MHIP atangtein thusawi ngaihthlak a ni bawk a. Pu K.Zakhuma, Vice President-in lawmthu sawiin hun a khar a ni.

Bethel Branch MUP, Champhai hi July ni 6, 1987 khan din niin, tun dinhmunah member 303, mipa 141 leh hmeichhia 162 an awm mek a ni. MUP In sak hna hi December ni 1, 2020 khan bultan a ni a, mizopa chhiara chhawng hnih, a dung feet 36 leh a vang feet 15 a zau a ni.