2142/2022-2023

Aizawl 1st October 2022: Vawiin khan I&PR Minister Pu Lalruatkima’n Tuikual North ah Tuikual North MUP buatsaihin Upate Ni lawmna inkhawm a hmanpui.

Minister Pu Lalruatkima chuan upate pawimawhzia sawiin mahni inchhung theuha chhungkaw hotu ber, thalaite  finchhuaha kaihruaitu, ram leh hnam tana mi tangkai an ni, a ti a, “Kan upa tawlh tawlh a, kan hriatna a pung tawlh tawlh a, kan fing tawlh tawlh a ni” a ti. “Upate niah hian upate kan chawimawi che u”, Pu Lalruatkima chuan a ti a. Hnam ropui apiangin upate an zahin an ngaihlu a, keini pawhin kan tu leh fate thlengin upate hlutna kan inzirtir a pawimawh a ni, a ti. Zawlbuk a bo hnuah YMA, MUP, MHIP ten chhiat thatah mawhphurhna lain kan ram leh hnam kal zelna atana mi tangkai, sawrkar thurawn petu niin Valupa dinhmunah an ding ta a ni, Minister chuan a ti a. Hetianga pawl chak tak ni mahse mi chunga len emaw mi chungtlak emaw hi kan tih tur a ni lo tih hre thar leh turin kalkhawm te a chah bawk. An pawl dinchhan leh thil tum - Ram leh Hnam Hruaitute leh Sorkár pawh a theih ang kawng kawnga finchhuahpui; Ram leh Hnam kalhmang leh nun-dan phung te, thil tha lo leh chhiatna kawng hawi ni ngeia hriatte kawng dik kawh hmuh; Zoram Political Party hrang hrang te, thukhat vuaa thil tih a tul hun leh a tul dan thute a ngaihdan pek ve thin; Upa leh tupawh, harsatna kawng hrang hrang leh manganna nei te, hamtha záwka an awm theihna kawng ngaihtuahpui tih te leh a dang te hre reng a, hlenchhuah tuma ram tana mi tangkai ni chhunzawm zel turin Mizoram Upa Pawlte a chah a ni.

Kum 1954 khan Pu Pakunga Assam Rifle Subedar pension hovin mi thahnemngai ten Mizoram Pensioner Association an din a, chumi hnuah member tam zawk an tel theihnan Upa Lengkhawm tia a hming vuah a lo ni a. Kum 1961 ah Zoram Upa Pawl tiin a hming thlak a ni. Assembly hmasa ber hi May 16, 1961 ah Theatre Hall (Vanapa Hall) ah neih a ni a. Kum 1977 ah sawrkar hriatpuiin Firms & Societies ah ziah luh an ni.

Vawiin Upate Ni lawmna programme hi Tuikual North MUP Vice Chairman Pu C.Lalramliana’n a kaihruai a. Local Council, YMA leh MHIP aiawhten thu an sawi a ni.