2141/2022-2023

Lunglei the 1^st October, 2022 -  Lungpuizawl AH&Vety Farm, Lunglei District-a Ar awp keuna leh Ar vulhna (Hatchery cum Poultry Farm) ah Ar note (rainbow rooster) awp keu tura hmalakna chu kal mek chu vawiin khan Lunglei HPC Vice Chairman chuan a hmunah a tlawh a ni.

Ar awpkeuna khawl ah hian rainbow rooster tui 5000 dah niin tukin zing atang khan an keu tan a. Heng Ar Note te hi HPC Lunglei leh AH&Vety Department tangkawp hmalaknain Ar vulh tura thlan beneficiary chhungkua te hnenah pek chhuah an ni dawn a ni.

Lunglei HPC Vice Chairman Pu Lawmawma Tochhawng chuan hmun hla tak atanga Ar note kan lakluhin kawng lakah tam tak an thi then thin a, he harsatna sukiang tura Lungpuizawl Hatchery cum Poultry Farm tangkai taka hman chhoh mek a ni chu lawmawm a tih thu a sawi a. Kan economy than len zelnaah nghawng tha tak ala nei zel dawn a ni, a ti bawk. Mizoram chhim lam District-te Ar note leh arsa ah kan intodelh chhoh theihnan theihtawpin HPC Lunglei leh AH&Vety chuan hma kan la tlang zel dawn a ni tiin ruahmanna chu tih hmasawn zel tum anih thu a sawi.

Dr.Engkunga Chhangte, Joint Director, Southern Zone, AH&Vety, Dr. F. Lalramhluna, Principal, IAH & VTI, Lungpuizawl leh AH&Vety Department thawktu dangten anlo dawngsawng a ni.

Lungpuizawl Farm-a ar awpkeuna leh Broiler ar vulhna hi kum 2017-18 ah NABARD RIDF atanga Rs cheng nuai 519.25 hmuh atanga sak a ni a, Aarkon Infrastructure, Uttar Pradesh ten a sak hna thawkin nikum October ni 14 khan Dr K Beichhua hian a hawng a ni.