2140/2022-2023

Champhai, the 1st October, 2022: Mizoram hmun dangte rualin vawiin khan Champhaiah Faina Hapta 2022 bultan a ni. Zing dar 7 ah a hawnna hun CHANEM building ground floor-ah Swachh Bharat Mission (Urban), UD&PA department Champhai buatsaihin neih a ni a. He hun hi Champhai District Bawrhsap Pu James Lalrinchhana chuan hmanpuiin Faina Hapta 2022, October ni 1 atanga 8 chhunga hman tur leh bawlhhlawh thliar hran kawnga inzirtirna 'Segregation of Waste At Source (SWAS)' kalpui tur chu a hawng a ni.

Pu James Lalrinchhana chuan thawhhona tha tak nena faina hapta bultan a ni chu phurawm a tih thu leh lawmawm a tih thu sawiin, faina hapta kum tina hman thin chuan kan thinlungah fai duhna tak tak thlen se a hlawkthlak hle dawn a ni, a ti a. Faina chu hapta khat chhung mai nilo, kum tluana nunpuia hman tur a nih thu tarlangin, mimal tin atanga tanin chhungkua, veng leh ram pum anga kalpui a tul thu a sawi a. Hman khat daih single use plastic hmang lo tura tanrual leh inzirtirna kalpui zel a tul thu sawiin, faina kawnga hmuh theiha hmasawnna awm chu chhuanawm a tih thu a sawi bawk.

Bawrhsap chuan hmanni lawka Indian Swachhata Leaque 2022 kaltlanga faina beihpui thlaknaah India ram khawpui mihring 25,000- 50,000 chenna huangah Champhai khawpuiin special mention, abik taka hnathawh that lawmpuina leh hriatpuina a dawng chu lawmawm a tih thu a sawi a. Faina kawnga  tanlakna chhawmnung zel turin district mipuite a sawm a. Fainain hriselna a nghawng thu leh  faina hmangin natna kai tur tam tak pumpelh theih a nih thu a sawi a. District mipuite chu faina meichher kengtu nih vek tum tura rilru siam theuh tura sawmin faina hapta 2022 leh bawlhhlawh thliar hran kawnga inzirtirna 'Segregation of Waste At Source (SWAS) kalpui tur chu a hawng a ni.

Faina hapta hawnna hun hi Pi R.Lalnunkimi, District Urban Development Officer (DUDO) chuan a kaihruai a. Faina thutiam Pu T.T Laltanpuia, District Education Officer (DEO) kaihhruaiin neih a ni a. Pu F.Lalhriatpuia, J.E, UD&PA Department hnen atangin faina hapta hman hun chhunga hmalak dan tur tlangpui ngaihthlak a ni a. Pi Julie C.Mawii, District Coordinator, Swachh Bharat Mission (Grameen), PHE Department-in bawlhhlawh tawih theih leh tawih theilo thliar hran dan a sawifiah a. Pu K.Rochhunga, Chairman, Joint V/C Champhai North chuan lawmthu sawiin hun a khar a ni.

Faina hapta pual hian mimal leh veng hrang hrangahte remchan dan anga faina hnatlang neih a ni a. DUDO Pi R. Lalnunkimi hovin bawlhhlawh thliarhran dan inzirtirna neih a ni bawk.

Ruahman dan chuan October ni 3 hian in, dawr leh pisa tinahte kalin bawlhhlawh thliarhranna campaign, brochure/leaflet/poster-te sem tum a ni a. October ni 4 hian School, College, Bazar, Biakin leh Sawrkar Pisa-ahte bawlhhlawh thliar hran dan inzirtirna kalpui tum a ni a, Two-bin system hman dan chipchiar taka entir tum a ni. October ni 5 hian mimal leh pawl anga bawlhhlawh sawngbawlna hmun hrang hrangte tlawh tum a ni a. October ni 6 ah veng tinah aurinna hmangin bawlhhlawh thliarhran inzirtirna puan tum a ni a. October ni 7 ah hmun lun lai leh mipui tamna hmunahte bawlhhlawh thliarhran inzirtir nan bawlhhlawh bawm (Twin-bin) hun tum a ni a, October ni 8 ah faina hapta khar a ni ang.