4290/2023-2024

Champhai, the 21st March, 2024: Vawiin chawhnu khan Lt Gen Raghu Srinivasan, VSM, Director General Border Roads chuan Champhai District a tlawh. Lt Gen Raghu Srinivasan hi 74 RCC (GREF) BRTF, Champhai Zotlangah District Bawrhsap Pu James Lalrinchhana chuan lo dawngsawngin district chhunga BRTF hmalaknate sawipuiin mamawhte a lo thlen a ni.

Lt Gen Raghu Srinivasan chuan kum 1960 chho atangin Mizoramah BRTF in inkalpawhna kawngpui siama project hrang hrang an thawh tawh thu sawiin, buaina lian tham tawk lova tun thlenga hnathawh a ni chu lawmawm a tih thu a sawi a. Mizoramah BRTF in theihtawp chhuaha hma an lak thu leh mi leh sate pawh hmun hrang hrangah an neih thu sawiin, khawtlang mipuite chu an hmalaknate tha taka thlawpa hmasawnna hnathawh kawngah thahnemngai taka tawiawm tlat turin a sawm a ni.

District Bawrhsap Pu James Lalrinchhana chuan Champhai District-a BRTF hmalaknate tarlangin, BRTF atanga thlawpna tha tak District Adminstration-in a dawng thin chu lawmawm a tih thu a sawi a. Tha taka ramri hnaih inkalpawhna kawngpui border road-te enkawl a ni chu lawmawm tiin, district mipuite'n tangkai taka an hman thu a sawi a. BRTF hnuaia siam tur Zokhawthar to New Hruaikawn inkalpawhna kawngpui leh Tualcheng to Pamchung inkalpawhna kawngpui siam dan tur chungchangte a sawipui a. Zokhawthar to New Hruaikawn inkalpawhna kawngpui siam turah Old Hruaikawn thleng lova hmaih a nih chungchang pawh DG hnenah hian thlenin Old Hruaikawn thlenga kawng siam sak turin a ngen a; Director General of Border Roads Lt Gen Raghu Srinivasan chuan Old Hruaikawn thlenga kawng siam a nih tur thu District Bawrhsap hi a hrilh a ni.

Hemi hnu hian Lt Gen Raghu Srinivasan hian Zokhawthar khua tlawhin Assam Rifles hmunhma leh pawimawh dangte a tlawh a ni.

Director General of Border Roads Lt Gen Raghu Srinivasan hi Pu SP Kolipey, Chief Engineer, Project Pushpak leh Officer dangte'n an tawiawm a ni.