4289/2023-2024

Dated Serchhip, the 21st March, 2024: Mizo Hmeichhe Insuihkhawm Pawl (MHIP) Sub-Hqrs. Serchhip Conference vawi 12-na chu Serchhip Auditoriumah ‘MHIP Sub-Hqrs. Serchhip Silver Jubilee’ lawmna Programme hman chhunzawm niin, he hun hmanpuitu Serchhip DIPRO Pi Lalnunmawii, Systematic Voters’ Education and Electoral Participation (SVEEP) Nodal Officer ni bawk chuan Lok Sabha 2024 inthlanpuia vote thlak theuh turin Serchhip District MHIP te a sawm a ni.

SVEEP Nodal Officer chuan Lok Sabha Inthlanpui lo awm leh turah MHIP member zawng zawngte chu uar taka vote thlak leh vek turin a sawm a. Serchhip District chu lehkhathiam tamna leh Mizoram District dangte zingah pawh Vote tlak that na ber a nih thin thu sawiin, MLA Election neih zawh takah Serchhipo Sub Headquarters MHIP leh District Election Office thawhhona avangin District chhunga khaw tinah hmeichhe voters te choh chhuah an nih dan te a sawi a. MHIP Branch tin te chu Lok Sabha MP Inthlanna lo awm leh tur ah pawh uar taka Vote thlak leh tur leh an veng/khua theuha an member pui leh midangte zirtirtu ni turin a chah a. SVEEP hnuaia District Election Office buatsaih ‘Lok Sabha Inthlanpuia Vote thlak ngei tura intiamkamna’ Signature Campaign-ah pawh MHIP member a tam thei ang ber te hming sign turin Pi Lalnunmawii chuan a sawm a ni.

DIPRO Serchhip chuan MHIP Serchhip Sub Hqrs Conference Vawi 12-na leh an kum 25-na (Silver Jubilee 1999-2024) lawmna programme hmangtu MHIP member kalkhawmte chu Conference leh Silver Jubilee chibai a buk a. Tunlai khawvel danglam chho zelah Mizo hmeichhiate chu sumdawnna leh eizawnna kawng hrang hrangah thawktu ber te an lo nih chho tak thute, kawng tin rengah nasa taka hma an sawn thute sawiin an chhungkua leh fate tan, an veng leh an ram tana malsawmna ni zel turin Jubilee hmangtute a sawm a ni.

Serchhip Sub Hqrs MHIP Conference Vawi 12-na leh Silver Jubillee lawmna programme hun khatnaah hian MHIP Member chatuan ram pan ta te sunna hun urhsun taka hman anih bakah MHIP Thuthlung sawirualna hun hman ho a ni a. MHIP Gen.Hqrs, Serchhip Sub Hqrs YMA leh MUP bakah Joint VC aiawhte atang a thusawi tawi ngaihthlak niin kum 25 chhung chawl lo a MHIP hruaitu lo ni tawh te hnenah ‘Chawimawina’ hlan a ni bawk.

Nimin khan New Serchhip YMA Hall-a MHIP Sub-Headquarters Serchhip Conference Vawi 12-na ‘Rorel Inkhawm’ President Lianthangi kaihhruaina a neih fel lo ni tawhin, agenda hrang hrang lut zingah ‘Mizo hnam chimrala kan awm loh nan pianpun inzirtirna tura hmalak nise’ tih te, ‘Puipunna ah Hmeichhia ten puan bih uar tura inzirtir nise’ tih te pawm a ni a. Heng bakah hian ‘Inneihna ah Puanchei bih tura hmalak ni rawh se’ tih pawh pawmin MHIP Sub-Hqrs. Serchhip Office hmun nghet nei tura an hmalakna chu chhunzawm zel nise an ti a, kum 2024 Budget atan Rs. 214,600/ chu an pawm bawk a ni.

MHIP Sub-Hqrs. Serchhip hi kum 1999- a din niin an hnuaiah hian MHIP Block 3- Tawitlang Block; Ramlai Block leh East Lungdar Block te a awm a, Joint MHIP chu khaw 4- Bungtlang, Thenzawl, East Lungdar leh North Vanlaiphai-ah te a ding bawk a. MHIP Sub-Hqrs. Serchhip hnuaiah hian MHIP Branch 82 awmin Member 21,106 an awm mek a ni.