4288/2023-2024

Dated Serchhip, the 21st March, 2024: Vawiin chawhnu dar 2.30 khan EF&CC Department, Dept. of Botany leh Eco-Club, Govt. Serchhip College te buatsaihin ‘Seminar in Observance of International Day of Forests’ chu HD Rosanga Multipurpose Hall, Govt Serchhip College ah hman a ni.

He seminar hi Dr Lalremsiami Hrahsel, Asst.Professor chuan kaihruaiin, Pu C Laldintluanga, Principal, Govt Serchhip College chuan inlawmna thu a sawi a. Pu Rongura Hrahsel MFS (Rtd), IPVM National Awardee ni bawk chuan zirtirna a pe a. Mizorama kan leilung hausakna hlu ber chu kan ramngaw, nungcha leh biodiversity-te an nih thu leh, heng kan ram rohlute duat na chang kan hriat loh avangin kan tuar chho mek tih a sawi a. Mizoram pumah ‘TUI HARSATNA’ kan tawk chho mek tih sawiin, hei hi mitinin kan vei a, kan ramngaw neihsate humhalh bakah, ramngaw siam belh a pawimawh thu a sawi a. Ramngawte loh theih loh a thil danga kan hmang duh a nih pawhin renchem taka kan hman a tul thu a sawi a ni.

Pu Rongura Hrahsel chuan Wildlife Protection Act -1972 chungchangah mipuite hriattur pawimawhte tarlangin, Mizoramah nungchate chenna ramngaw a chereu nasat avang leh mihringten kan tihhlum nasat avangin an tlem tawh hle a, nasa zawka kan humhalh a pawimawh thu a tarlang bawk.

Mizoram biodiversity hi state pawn lam miten an hria in an hlut a; zirbingna leh thiamna sang zawk neih nan an hmang nasa a. Mizoram mipuite zawkin hlutna chang hre lovin kum tin kan tikang a, silai, bomb leh tur hmanga ti chereu in a sa te kan ei bawk a. Hei hi a pawiin hemi kawnga hmasawn kan ngaih thu he programe-ah hian uar taka sawi ho a ni.

He Seminar ah hian Govt Serchhip College zirlai leh zirtirtute, Thenzawl Forest Division staff te bakah, New Serchhip leh Chhiahtlang  Village Forest Development Committee atangin mi engemawzat an tel a ni.