4287/2023-2024

Champhai, the 21st March, 2024: Lok Sabha Inthlanpui 2024 hnuaia hmalakna kalpui mek zelah vawiin khan District Election Office, Champhai District buatsaihin DC Conference Hall-ah District chhunga Boo,th Level Officer (BLO) te tan training buatsaih a ni.

He hun hmanpuitu District Election Officer Pu James Lalrinchhana chuan training ngaipawimawh BLO an tel tha chu lawmawm a tih thu sawiin, election felfai bultanna chu electoral roll a ni a, hei hi khawtlang hrechiang berte zing ami BLO te tel lovin a puitlin theih loh a ni, a ti a. ECI full Commission-in Mizoram an rawn tlawh tumin BLO te pawimawhzia pawh lo hrilhfiah an nih thu a sawi a. BLO te chu election hlawhtling neih kawnga a phena mi pawimawh ber an nih thu sawiin, an chanvo leh mawhphurhnate chu tha taka hlenchhuah zel tum turin a fuih a. Thawhhona tha tel lovin inthlan hmachhawn a harsat thu sawiin, BLO te chu thawhhopuiah sawmin, rawtna leh mamawh an neihte thlen hreh lo turin a chah a. Khawtlang tana an pawimawhzia hriaa huaisen leh thahnemngai taka an mawhphurhnate hlenchhuah zel tum turin a chah bawk.

He hun hi Pu Benjamin Zalawma Ralte, Election Officer chuan kaihruaiin Pu K. Zorammuana, Dy. DEO/Addl. DC in kalkhawmte lawmna thu a sawi a. Dr. Vanlalnunpuii Ralte, AERO/ALMT in election hun chhunga BLO te mawhphurhna a sawifiah a. Pu N. Lalzarzova, AERO/ALMT in Postal Ballot chungchanga hriattur pawimawhte a zirtir bawk.

Training hi session 2 ah then a ni a. Session 1-na hi chawhma dar 10:00 ah tan a ni a, he hunah hian 25-East Tuipui (ST) AC hnuaia BLO zawng zawngte leh 23-Champhai North (ST) AC hnuaia Champhai khawpui hlat deuh khuaa BLO te an tel a. Session 2-na hi chawhnu dar 1:00 ah tan niin, he hunah hian 24-Champhai South (ST) AC hnuaia BLO zawng zawngte bakah 23- Champhai North (ST) AC hnuaia Champhai khawpui hnaih khua leh venga BLO te an tel a ni.