2097/2022-2023

Champhai, the 28th September, 2022: Dungtlang Branch YMA buatsaiha  Vangpui Kût  tum 36-na lawm mek ni thumna, Zokhua, Dungtlanga neih chu vawiin chawhma dar 10 khan District Bawrhsap Pu James Lalrinchhana chuan khuallian niin a hmanpui a, vawiin atanga hnam lam, zai leh infiamna hmanga hun hman tan chu a hawng. He hunah hian Pu Malsawmthanga, VCP Dungtlang chu kût thlengtu a ni.

Khuallian Pu James Lalrinchhana chuan Vangpui Kût vawi 36-na lai hman a ni thei leh hmanpui tura sawm a ni chu lawmawm a tih thu a sawi a. Dungtlang khaw Lal fanu hmeltha Lianchhiari tualchaina hmun ngeia Vangpui Kût hman a ni lehzel chu inhmeh a tih thu sawiin, a a hlawhtlin theih nana theihtawp chhuahtute leh buatsaihtute fakawm a ti a. Pipu sulhnu tamna Tuipuiral tlangdunga pipu sulhnu humhim tlat a tul thu sawiin, an sulhnu bakah an nun zemawite chhawmnun zel a tul thu a sawi a. Kalkhawmte chu hmasawnna kawng dik zawh turin rualelna dik leh rilru puthmang dik nei tura chahin, mahni theuh inenfiah turin a sawm a. Zirna tha leh kalhmang dik tel lovin hmasawnna dik leh tha a awm theih loh thu sawiin, zirna in leh a vel humhima, zirtirtu leh zirlaiteah hmasawnna dik thlen tura tanlak a tul thu a sawi bawk.

District Bawrhsap chuan faina chu hriselna nena inngheng tlat a nih thu leh hnathawk thei tura hrisel a pawimawh hmasak thu sawiin, taksa, in leh a vel mai bakah rilru thlenga tih thianghlim a tul a ni, a ti a. Nu leh pa leh rual u zawkte chu nakin zela khawtlang hruaitu tur naupangte tana khaw ralmuang, a tha zawnga inelna hmun khawtlang siam kawnga tan la turin a fuih a. Chhungkua, khawtlang leh ram tibuai mektu leh thalaite nun tichhe mektu drugs do kawngah tanrual a tul thu sawiin, hemi kawnga inhnamhnawihte dapchhuah leh man kawnga tanhopuiah district mipuite a sawm a. District administration chuan ruihhlo tawlh leh zawrh kawnga inhnamhnawih mante lakah ngaihhnathiamna a neih dawn loh thu a sawi bawk.

Khuallian chuan Vangpui Kût hmanin tualzal nun tha leh zonun zemawi chawilar kawngah tanlak tharna thlen se a duh thu sawiin, cultural day pual hian mizo tlawmngaihna ti vul zel ang u, tiin kalkhawmte a sawm a. Khawtlang mipuite chu nungcha, thing leh maute duata mamawh bak tichereu lova humhalh turin a sawm a. Kalkhawmte chu dan leh hraite zirchianga tha taka zawm tur leh midangte hrilhhriat kawnga tan la turin a chah a, khaw changkang zel ni tur chuan dan leh hrai kan zawm that a tul a ni, a ti. Khua leh tui tha ni turin District Magistrate thuchhuahte tha taka zawm a ngaih thu tarlangin, lirthei document felfai kawl, khalh dan leh dan lova lirthei lakluh chungchangahte dan zawm a tul thu a sawi bawk a. Dungtlang mipuite chu YMA taka nung tur leh Vangpui Kût hlimawm tak hmang tura duhsakna hlanin Vangpui Kût Cultural Day chu a hawng a ni.

Vawiin Vangpui Kût lawmna peng pakhat cultural day hawnna hun hi Pu Lalhmuakmawia Khiangte, Vice President, Dungtlang Branch YMA chuan a kaihruai a. Secretary report Pu C.Lalzarmawia, Asst. Secretary hnen atangin ngaihthlak a ni a. Kût thlengtu VCP Dungtlang Pu Malsawmthanga, Tuipuiral Group YMA Vice President Pu C.Lalpekthanga leh Dungtlang Branch YMA President Pu Deny Lalremruata te hnen atangin thusawi ngaihthlak a ni bawk a. Hawnna hman zawh hnu hian mizo infiamna hrang hrang hmangin section intihsiakna hman chhunzawm nghal a ni.

Vangpui Kût hi khawtlang huapa hman thin niin, hmasawnna lam inkawhhmuhna, infiamna leh hnam ziarang tarlang thei zawnga hun hman thin a ni. Vangpui Kût hi kar tir thawhtanni September ni 26 khan hman tan niin, nimin lamah infiamna buatsaiha hun hman a ni a, naktuk hian kharna hun hman a ni ang.

Pu James Lalrinchhana chuan vawiin vek khan Bee Keeping Association Dungtlang hruaitute kawmin an hmalaknate a sawipui a. Mamawh an thlente a theih anga bawhzui sak a tum thu a hrilh a ni. Tun dinhmunah Dungtlangah hian khuai khawi chhungkua 14 an awm mek a, modern bee box 300 velah khuai an khawi mek a, kum khatah season 4 awmin season tin khuaizu quintal 3 dawn an thar thin a ni.

Chawhnu lamah Kelkang khua tlawhin khawtlang hruaitute nen inkawmhona hun an hmang a. Khawtlang mamawh leh tul thlente sawiho niin hmalak theih dan turte ngaihtuahho a ni a. Dan leh hrai zawm chungchang inzirtirna leh civil administration kenkawh chungchangah theihtawp chhuah turin District chhunga VC te a ngen nghal bawk.