2096/2022-2023

Kolasib dated 28th September 2022: Vawiin khan I&PR Conference Hall, Kolasibah ‘Skill Upgradation under Eri Silk Development Project’ hnuai a Silk Samagra-2 kaltlanga hamthatna dawng tur thlanchhuah mi 60-te tan Training buatsaih a ni a. Pi Lalmuansangi, District Sericulture Officer, Kolasib chuan hun kaihruaiin Pu John LT Sanga, Deputy Commissioner-in Training hawnna hun a hmang bawk a ni.

Pu John LT Sanga chuan khawsak tih hmasawn nana sawrkar ruahmanna hrang hrang hlawhtlinna chu a dawngtute kut ah a innghah thui hle thu sawiin hamthatna dawng te hlawhtlinna chuan thawktute a tih phur zual thin thu a sawi. Silk Smagra-2 kaltlang hian Silk la deh chhuahna kawngah eizawnna tlak a hma la theuh turin kalkhawm te a chah a, midangte tan a kawng kawhhmuhtu leh entawntlak khawp a Silk tharchhuah kawnga Kolasib tihmingthatu nih tum tuirn a fuih bawk a ni.

Vawiin hian Pi Christina Lalhruaitluangi, Sericulture Extension Officer-in Silk Samagra-2 kalphung inhrilh fiahna hun hmangin Pu Vanlalruata, SEO, Kawnpui Circle leh Pu Roluahpuia, SD, Bilkhawthlirten Eri pangang khawi dan chungchangah zirtirna an pe a. Pu Saithuama Sailo, SPO in lawmthu sawina hun a hmang bawk a ni.

Eri Silk Development Project – Silk Samagra – 2 hi Ministry of Textile, Govt. of India atanga lo kal a ni a. Aizawl, Lunglei, Kolasib, Serchhip leh Hnahthial ahte kalpui niin Kolasib district ah beneficiaries 100 an awm mek a ni. Project pumpui hi Rs. 17.98 Crore hu a ni.Kolasib District chhung a kalpui dan chu hetiang hi a ni :

1. Kissan Nursery : Project in a ken tel Changkhen (Kesseru) Nursery siam tur a ni a. Changkhen kung hi beneficiary 1 in 400 theuh phun tur a ni. Ni 26.07.2022 khan a vawi khatna atan kung 200 theuh beneficiaries te hnen ah pek an lo ni tawh a, a bak hi la in pek leh tur a ni.

2. Assistance for Plantation Development : Pangang chaw hmun sam fai leh thlawh faina tur atan beneficiaries te hnen ah installment thumin tanpuina pek an ni dawn a ni.

3. Assistance for Construction of Rearing House : Pangang in sakna tur pawh project ah hian ruahmanna siam niin hei hi farmer te hnenah kumin chhung ngei a pek tum a ni.

4. Assistance for Rearing and mounting equipments: Pangang khawina tur atan a hmanrua leh bungrua heng, rearing tray, plastic mountage, bleaching powder leh a dang te hi pek tur in project hian ruahmanna a siam a.

Project in beneficiary te lak atanga a phut chu beneficiary 1 in kum khat ah DFL 400 tal an khawi a, chumi atang chuan silk la 28.8 Kg tal tharchhuah a ni a. Hetiang a an thar theih chuan buhchium man ah Rs. 54,000 aia tlem lo leh silk la atangin Rs. 14,000 thar chhuak theuh thei tur a chhut a ni.