2095/2022-2023
Lunglei the 28th September 2022 : Vawiin khan Women and Child Development, Social Welfare Department hnuaia DPO leh CDPO Office, Lunglei ICDS Project te chuan Poshan Maah (Nutrition month) hmanna kal zelah Mother’s Kitchen Contest hun an hmang.

He hun hi Pi Lalthlamuani Rokhum, Child Development Project Officer, Lunglei ICDS Project in kaihruai in, worker leh helper lo kalkhawm te chu Poshan Maah hun chhunga an hnathawh tawh zawng zawng ah lawmthu a hrilh a, hmachhawp la awm te thahnem ngai taka ti zel turin a fuih bawk a ni.

Dr. Lalhruaitluangi Chhangte, District Programme officer, Lunglei District, chuan thu sawi in Anganwadi Workers te hnenah Poshan Maah (National Nutrition Month) hman hun chhunga hun, tha, leh sum sen te chu a lo thlawn mai a a ral loh nan awmze nei taka hna thawk thin turin a fuih a. Tin, Mizo chaw leh chawhmeh hrang hrang (Traditional foods) te chu nu naupai, naupawm, leh naupang te tan a that tawk thu sawiin, pawn lam chaw siam sa (processed food) emaw hnam dang chaw siam dan te aia a thatloh bikna a awm loh thu a sawi a. Kan ram ngeia tharchhuah thlai leh chawhmeh chi hrang hrang te leh, kan chhehvela kan hmuh theih te hi hriselna atana a that tawk thu a sawi a ni.

He hunah hian Anganwadi Worker ten Mizo chaw tha chi hrang hrang (traditional foods) an siam te phochhuakin, a siam dan leh naupang te tana a thatna te sawi fiah niin. Heng chaw leh chawhmeh te hi mitin tan hmanrua hautak lova siam theih te vek an ni. Tin, Tri colour Thali theme zulzuiin Tri Colour Rice Cake te, Mizo Thali (chaw leh chawhmeh) te siam a ni bawk.

Mother’s Kitchen Contest ah hian Theme Pathum awmin, chungte chu:
1. Promotion of Traditional Foods (Mizo chaw tha chi hrang hrang chawilar)
2. Promotion of Tri Colour Thali (Hnam puanzar rawng mil a siam chaw leh chawhmeh siam)
3. Budget Menu competition (Mitin ban phak chaw tha siam dan menu hmanga intihsiak)