1267/2022-2023
Champhai, the 15th July, 2022: Vawiin chawhnu dar 3:30 khan Champhai District Bawrhsap chuan Farkawn khua tlawhin Vawk hrileng avanga tawrhnate line department leh bank hotute nen an enfiah.

Pu James Lalrinchhana chuan vawk pul hrileng avanga Champhai District chhunga Vawk thahnem tak a thih phah leh suat a ni chu pawi a tih thu sawiin, harsatna tawkte thinlung taka a tawrhpui thu a sawi a. Vawk a thih chuah chuah avangin loan la a vawk vulhtute harsatna tawh engtinnge kan buaipui ang tih ngaihven tura bank hotute leh line department hotute nena Farkawn tlawh an nih thu a sawi a. An harsatnate bank hotute hnena thlen a nih thu leh District Bankers Meeting-ah pawh Vawk vulhtute harsatna thlen a sawiho a nih thu a sawi bawk.

District Bawrhsap chuan District tana hmalakna tul dangte tarlangin, ramri depa awmte chu ruihhlo leh a kaihhnawih ven kawnga theihtawp chhuaha tanhopuiah a sawm a. Hman khat daih polythene-te hmang tawh lo tura tanrual a tul thu a sawi bawk a. Covid-19 hrileng thar leh laka fimkhur tura inkaihhruaina dan Covid-19 Appropriate Behaviour (CAB) zawm kawngah thahnemngai taka tha thar thawh leh turin mipuite a chah nghal bawk a ni.

Dr. Lalrinhlui, VO Champhai tarlan danin April ni 11, 2022 khan Farkawnah ASF hri hmuhchhuah a ni a. Vawiin July ni 15,2022 thleng hian Farkawnah Vawk 859 thiin Vawk 1794 te suat an ni a, Vawk thi leh suat belhkhawn zat hi 2653 a tling a ni. Vawk vulh loan la mi 74 awmin, loan cheng nuai 300 chuang an la a ni.

Thusawitu dang Pu Jyoti Munna Soren, Lead District Manager (LDM) Champhai chuan Vawk pul hrileng avanga Vawk chante chu an loan lak dan kimchang leh rulh dante, loan rulh kawnga harsatna an tawh dante, vawk vulh zat, a thi leh a la bang leh tul dangte report kimchang siama Bank Branch a thehlut turin a hrilh a. Hemi hnu hian District Level Committee hmingin State Level Bankers' Committee (SLBC) lamah report thehlut a nih tur thu a tarlang a ni.

Vawiin hian Farkawn YMA Hall-ah Farkawn VC, NGO leh Farkawn Vawk Vulh Society-te nen inrawnkhawmna leh hmalak zel dan tur inhrilhhriatna hun hman a ni a. Hemi hnu hian Vawk pul hri avanga tawrhnate enfiah a ni.