1268/2022-2023 

Aizawl 15.07.2022: Chief Minister Pu Zoramthanga chuan vawiin khan Mizoram a housing complex hmasa ber tur ‘Federation Enclave’ project chu Govt. Complex, Luangmualah a tlangzarh. Flat/Apartment man atanga 10% in booking a tih theih nghal a ni. He project hi Mizoram sawrkar hnuaia hnathawk intelkhawm Federation of Mizoram Government Employees & Workers (FMGE&W) te Mizoram sawrkar hnathawkte puala housing complex din a ni a. Flat/Apartment zathum chuang awm thei tura ruahman a ni.

Chief Minister chuan sawrkar hnathawk ten theihtawpa bul an tan ‘Federation Enclave’ chu a hlawhtlin ngei a duhsak thu sawiin, he hmalakna hi mi tam takin an tangkaipui hle tur thu a sawi a. Mamawhna avanga piang hmalakna chu a hmang tangkaitu turte mamawhna phuhru ngei tura buatsaih a pawimawh thu sawiin, ngaihtuahna leh hmathlir tha tak hman a pawimawh thu a sawi a. Hmun dangah, district dangah pawh hetiang ang housing complex siam duh an la awm zel theih thu sawiin, hmasawnna ruhrel tha din tur chuan plan tha tak neih a pawimawh thu a sawi a. Eng hmalakna pawh ni se, vision neih that a, kan tuma  kan chian chuan engtikah emaw a hlawhtlin tur thu te, a tlachawp chin chiah ngaihtuah thin nih a hlauhawm thu a sawi.

Khualzahawm Er. K. Lalsawmvela, Adviser to CM (Technical) pawhin thu sawiin, sawrkar hnathawk chu an service chhungin hmun hrang hrang a post kual an nih thin avangin tam tak tan in hmun nghet tur ngaihtuah a remchang lo thin a. Heng housing complex hian remchanna sawrkar hnathawkte tan a thlen dan tur sawiin, a tam thei ang berin an ngaihven a booking an tih thuai a duhsak thu a sawi.

Er. R. Lalrammawia, Chairman, Mizoram Government Employees Housing Society chuan kalkhawmte lawmna thu sawiin, Pu Lalchuailova, FMGE&W President, Prof. Christopher Charles Benninger, Principal Architect and Town Planner, Er. Partha Phukan (PPa), Chairman and MD, Blue Mountain Corporation ten thu sawi bawkin, Pu J. Ramdinmawia, Secretary General chuan lawmthu sawiin hun a khar a ni.

Federation Enclave booking ti turte tana dilna, application form lakchhuahna tur collection centre te chu:

AIZAWL: MC Apex Bank, MINECO-Christina Vanlalnghaki -9856759481; Zamzo Real Estate, Khatla-Lalnunsiami-82590 40682; Mizoram Rural Bank, Zarkawt-Lalhlimpuii Sailo-81319 84206; La Paloma, Sikulpuikawn - Pu Hmingthansanga-9774611515

LUNGLEI: Zomawii Bakery, Chanmari III- Pi Zomawii-9436147541; Mizoram Rural Bank, Venglai-Lalramhluni (Notei)-76299 68644

CHAMPHAI: NextGen Computer Insitute, Kanan Veng - Cicilia Lalmuanpuii-88929 85330

KOLASIB: Mizoram Rural Bank, Diakkawn-Lalrintluangi-8974903998 

Application Form te hi Rs. 2,000/- zela lei tur a ni a. Non-Refundable a ni. Flat/Apartment man atanga 10% pe-in Booking tih theih a ni a, Allotment an hmu lo a nih chuan hei hi Refund leh theih a ni ang. A bak 90% zawng chu Bank hrang hrang SBI, MRB leh MC Apex Bank atang te-a Home Loan an lak hmangin pek theih a ni ang. Bank Loan te hi Project Site-a Construction Work Progress azir zelin Instalment-in Bank-in an pe chhuak ang.

Booking tih laia Full Payment ti nghal duh an awm a nih chuan Flat/Apartment man (Price) atanga 10% Discount pek an ni ang. Bank Loan hmanga Flat/Apartment lei tum te chuan Bank-in Eligibility Criteria an neih dan a zirin Home Loan an la in an la lo thei dawn tih an hriat a ngai a, Bank thuneihna liau liau-ah a innghat a ni. Bank-in Eligibility Criteria an set chungchangah hian FMGE&W leh Blue Mountain Company te hian inrawlh theihna an nei lo a. Chutihrualin Bank-in 'Eligible'-a a puan te chu Loan Proccessing leh Disbursement chungchangah theihtawpin Blue Mountain Company-in a pui dawn a ni.

FEDERATION ENCLAVE-a Flat/Apartment te hi Govt. of Mizoram hnuaia a ngheta thawk te tan lei theih a ni dawn a. Application Form-in a phut angin Proof of Employment Certificate an thil tel ngei tur a ni. Mizoram Govt. Employees Housing Society-in a approve-te hnenah chauh Blue Mountain Company hian Flat/Apartment a allot dawn a ni.

He housing project hi Blue Mountain Corporation in an kalpui a. Principal Architect chuChristopher Charles Benninger / CCBA Designs Pvt. Ltd. Niin, Statutory Liaison Architect chu George Lalzuia, Chief Architect, Mizoram PWD a ni a. Structural Consultant chu Sanjiv Parekh, SPA Consultants Pvt. Ltd., Kolkata niin Tata Consulting Engineers Ltd., Mumbai leh JP Geo-Technical Consultants, Kolkata te chu consultant an ni.