No.2791/2021-2022
Aizawl, 29th October, 2021: Champhai District Bawrhsap Pi Maria C.T Zuali chuan vawiin khan Hnahlan leh N. Diltlang khuate tlawhin Hnahlan Grape Growers Society, N. Diltlang khaw panna PMGSY kawng siamin tuilakna a tih chhiat te, Apple chinna hmun tura ruahmante leh N.Diltlang khuaa zirna in te a tlawh a ni.

Hnahlana Grape chingtute a kawmnaah Bawrhsap chuan sawrkar hmalakna enkawl zui leh vil zui kawngah mahni intodelh thei tura ngaihtuahna sen a tul thu sawiin, mahni kut ke a ding thei tura hmalam pan tum tlat turin Society member-te a fuih a. Sawrkar-ah innghat vek lova intodelh thei tura society chak tak nih tum turin a chah a. Thil thar chhuah leh sawngbawl kawngah a leitu turte hip thei tur leh an zawng chhang theih nana cheibawl thiam a tul thu a sawi bawk.

FOCUS Project Horticulture Department kaltlanga Grape huan tuaihnumna tura Grape kung awmsa leh upa tawhte cheihnum leh enkawl thatna tur fund kaltlanga hmalak dan turte sawiho a ni a. Nutrients management hmanga leitha vur, damdawi leh tul dang huam chin kalpui dan turte sawiho a ni a. Society hotute chuan leirem rapa mahni kut ke a ding thei tur leh intodelh tura hmalak zel an tum thu an sawi a ni.

Hemi hnu hian DC Office kaltlanga N.Diltlang Primary School choka sak mek leh Middle School-te a tlawh a. Zirtirtute chu Zirlaite hmakhua ngaia thahnemngai taka thawk turin a fuih a. Zirlai mai bakah zirtirna dangte kalpui a, Zirlai te'n Sikul kal an chak ngawih ngawih theihna tura boruak nuam zirthiamna hmuna siam tum turin a chah bawk a. Zirlai naupangte chu faina nunpui tur leh tum nei rana theihtawp chhuaha lehkha zir turin a chah nghal bawk a ni.

Heng bakah hian Bawrhsap hian N.Diltlang khaw panna PMGSY kawng siamin Zotui tuilakna a tih chhiat pawh tlawhin Jal Jeevan Mission kaltlanga tuilakna tha zawk siam tura ruahmanna siam a nih thu a hrilh a. Apple chinna hmun tura ruahman ramte Hnahlan leh N.Diltlang VC te nena enhoin Official-te nen hmalak zel dan tur an sawiho nghal bawk.

District Bawrhsap hi Pu B.Lalzarzova, DHO, Dr. Lallawmkima, DIPRO, Pu H.Lalhminghlua, Addl. DPC Samagra, Pu C.Vanlalhruaia, CAO leh Pu H.Vanlalmawia, JE, PHED ten an tawiawm a ni.