No.2790/2021-2022
Aizawl, 29th October, 2021 : Vawiin khan Mizoram Civil Service Association General Conference (MCSA) Vawi 45-na chu Synod Conference Centre-ah hman niin, Deputy Chief Minister Pu Tawnluia chu khuallian a ni.

Deputy Chief Minister Pu Tawnluia chuan thu sawiin MCS Association serving leh honorary member zawng zawng te a hmasa in General Conference vawi 45 na chibai a buk a. MCS Officer te hi State Administration a kul a taia sawrkarin a hman an ni a, a ti a. Mizoram dung leh vang ah- Secretariat, Directorate, District Administration, Sub-Division, Block leh Autonomous Body ah te ram in relbawlna hna thawk turin MCS te hi inzar pharhin; Sorkar Policy te, Scheme leh Programme leh Law and Order thlengin thui tak Sawrkar hi a in nghat a, Democracy rama thil pawimawh tak mipui rawngbawlna kawngah MCS Officer ten mawhphurhna sang tak an nei a ni, a ti a. Hun kal chho zelah kan ram pawh a thang chho zel a, kan hriat angin District thar pathum pawh tun Ministry in a function tir a, heng ah hian MCS Cadre pawh a than belh zel a. MCS Officer Grade hrang hrang paruk (6) ah 183 te awmin, Service Rules mumal zawk kan neih theih nan MCS Rules 2021; MCS (Limited Competitive Examination) Rules 2021 leh MCS (Induction) Regulations, 2021 pawh buatsaih fel a ni tawh a, reilote a hman tan tur a ni a ti a. Ram a thang zela, sorkar functions/hna pawh a lo tam ve zel a, Direct Quota in Post 15 chu MPSC kaltlangin lak a ni dawn a, examination process a kal mek a ni, a ti a.

Khuallian Pu Tawnluia chuan Covid-19 hripui vangin kan nunphung a khaihlak nasa hle maia, kan economy thleng in a nghawng a. He hripui kan do let naah hian District Administration a MCS Officer te tha thawh naah lawmthu sorkar aiawhin a sawi a. Mipui te tan development administration kan ken kawh naah tang lehzual turin leh an awmna hmun apiangah midang te kaihhruaitu leh entawn tlak ni turin a fuih a.

Deputy Chief minister chuan Ministry hian Flagship Programme pawimawh tak a nei a, Covid-19 vangin hma la zung zung thei hrih lo mah ila, hmalam hun a zia chho zel turah ngaiin chumi hunah pawh Scheme kan kenkawh naah SEDP hi zirchiang a a hlawhtlin theih nan nasa taka tan la turin MCS Officer te a chah a ni. Service hming in a sawi ang takin Mizoram service kan ni a, zoram dung leh vang hi kan ta neih a, khawi hmun ah pawh awm ila neitu nihna thinlung pu zel a, MCS te tan khawilai pawh hi Home Posting anga ngai a, Civil Service chak leh tha tak ramin a neih theih nan member te pawh in tuaithar a zelturin a fuih a ni.

Khuallian hian RAHBI Magazine tlangzarhna hun a hmang nghal a.

He hun hi Pi Florence Zotluangpuii, Vice President, MCSA in a kaihruai a, MCS thi mi 15 te sunna hun neih a ni a. Chief Minister Awardees Pi H.Lalchhandami leh Pu Lalrinawma Khiangte te lawmpuina hlan an ni a, Pu R.Lalthazuala Director, Rural Development chuan lawmthu sawiin he hun hi a khar a ni.