1/2023-2024

Champhai, the 1st April, 2023: Kum tina buatsaih thin Mizoram pum huam District hrang hrangte volleyball hmanga inelna, Mizoram Volleyball Association (MVA) Inter District Volleyball Championship- 2023, a tum 19-na chu nizan khan Kahrawt Field, Champhaiah khar a ni. Kharna hun hman hi Champhai District Bawrhsap Pu James Lalrinchhana chuan khuallian niin a hmanpui a ni.

Khuallian Pu James Lalrinchhana chuan Mizoram huap volleyball inelna lian berte zinga mi Champhaiin tluang taka a thleng thei chu lawmawm tiin, Inter District Volleyball Championsship chuan Champhai District-ah nasa zawka volleyball a chawisan lehzual ngei a beisei thu a sawi a. PMJVK kaltlangin Champhai District-ah Volleyball Court leh Viewing gallery hmun 53 ahte siam tuma project thehluh a nih thu a sawi a; a hlawhtlin theih chuan infiamna huanga hmasawnna ruhrel lian leh pawimawh tak a ni thei dawn a ni, a ti bawk.

Sports chuan mihringte nunah inthununna tha tak a tuh thu leh nunkawng dik zawh tura mi a kaihhruai theih thu sawiin, Inter District Volleyball Championship chuan inunauna tha tak a siam ngei a beisei thu a sawi a. A hlawhtlin theih nana sum leh pai, hun leh tha sengtu zawng zawngte chungah lawmthu sawiin, Line Department hrang hrangte hmalakna chhuanawm a tih thu a sawi bawk a. Final khel tur volleyball player-te chu infiamna thianghlim leh ropui tak, mipuite tana thlir manhla tak chhawpchhuak thei turin duhsakna a hlan a ni.

He hun hi Pu Donald Khawlhring, Organizing Committee Chairman chuan a kaihruai a. Pu Lalremruata, President, CDVA in lawmthu sawina hun a hmang bawk.

Kharna hun hman zawh hian mipa team final khelh niin, Champhai District chuan Serchhip District chu (3-1) 25-19, 25-12, 24-26, 25-18 a hnehin an champion a, hmeichhe lamah Lunglei an champion a ni.

Tv. David Zochhuanmawia, Fin. Secretary, MVA kaihhruaiin intihsiakna lawmmante sem chhuah a ni a. Team bakah mimal che tha lawmman dawngtute chu:

Best Spiker: Malsawmtluanga, Champhai District
Best Setter: Lalnunzira, Champhai District

Mizoram Volleyball Association (MVA) 19th Inter District Volleyball Championship 2023 hi March ni 27 atanga ni 31, 2023 chhungin Champhai Kahrawt Field-a volleyball court pahnihahte chhun leh zana khelh a ni a. Tun tum hi Champhaiin District huap volleyball inelna a thlen tum hnihna niin, District zawng zawngte an tel kim thei a, mipa team 11 leh hmeichhe team 9 te an tel a ni.