2/2023-2024

Aizawl the 1st April 2023 : Mizoram Samagra Shiksha buatsaihin District hrang hranga zirlai 280 te chu Shillong khawpui fanpui an ni a. Heng zirlaite hi Class IX-XI zirlai te an ni.

Zirlai exposure visit a kalte hian NEIGRIHMS, IIM, Donbosco museum, Umiam lake leh hmun pawimawh dang hrang hrangte an tlawh a. NEIGRIHMS-ah hian Prof. Daniel, Medical Superintendent leh a thawhpuiten an lo dawngsawng a, damdawiin department hrang hrangte an fan kualpui bakah khawl hrang hrang hnathawh dan te an lo hrilhfiah a. NEIGRIHMS-in cancer hospital an buatsaih mek leh inhemna khawl tharte pawh zirlaite hi entir an ni. He inhemna khawl thar hi USA ațanga chah cheng vbch 29 man khawl thar a ni a, cancer-in a khawih lai taksa bak hmun dang hem chhe lovin he khawl hian a hem thei a, inhemna khawl dang chuan taksa dangte pawh a hem ut thei a, he khawl hi chuan cancer lai chiah a hem  tih te Prof Daniala chuan a lo hrilhfiah.

NEIGRIHMS lecture Hall-ah zirlaite hi kalkhawmin Prof Daniala leh teaching faculty dangten zirlaite hi an zir zelna atana țangkai turte an lo hrilh a. Medical lam hna chu midangte tana inpekna leh rawngbawlna pawimawh a nih dan te, Doctor leh paramedicals lam zir duhte tana hriat tur pawimawhte an lo hrilh a ni. 

NEIGRIHMS tlawhtu zirlaite hi Mizoram District hrang hrang ațanga thlan chhuah zirlai 280 an ni a, pawl 9 ațanga 11 zirlai an ni. Batch thumah țhen an ni a, a in chhawkin ni thum chhung an tlawh a, zirlaite hian an hlawkpui bakah medical lama kal tumte pawhin rilru an siam ngheh phah tih te an sawi a ni.

Zirlaite hian NEIGRIHMS bakah IIM, Umiam lake, Wards lake, Donbosco museum leh hmun pawimawh țhenkhat an tlawh tel bawk.

Attachment

  • Loading attachment...