3/2023-2024

Date 1.4.2023: Tukin khan Tourism Minister Pu Robert Romawia Royte chuan Sakawrhmuituai tlang leh a chhehvel tlawhtute leh khualzinte inhnangfakna tur Tourist Cafeteria sakna hmun tur chu Sihphir VC te leh Lungdai VC te nen an en a. Sihphir leh Lungdai inrinna bul kawngpui hrulah sak ni se tiin rel a ni a, Lungdai VC te chuan lehkha ziah fel ngaite chu reiloteah tihfel an tum thu an sawi.

Tourism Minister chuan Sakawrhmuituai tlang leh a chhehvelte chu mipuiin an tlawh nasa hle tih sawiin, mumal zawka enkawl zel tul a tih thu a sawi a. He Cafeteria building sak hna pawh hi rang taka tan ni se a duh thu a sawi bawk a ni.

Tourism Minister hi Pu V. Lalengmawia MCS, Jt Secretary & CEO MTDA leh EE, MTDA bakah Sihphir leh Lungdai khaw VCP ten an tawiawm a ni.

He mi hnu hian Aizawl East-II bialtu MLA leh Minister chuan a bial chhunga Bethany Road, Chhinga Veng hmun hniha lei dawh mek te a tlawh bawk a. Chhinga Veng chhunga Bethany area chu kawngpuiin a pawh ve theih nan theihtawpa tan a lak thu a sawi. Bethany Veng mipuite, Local Council leh Bethany Welfare te tanlakna fakawm a tih thu sawiin, mahni in hmun a thlawna kawngpui tlang theih nana petute chu chhuanawm a tih thu a sawi bawk.

Ministry of Tribal Affairs sum cheng Nuai 140 leh Finance Ministry sum cheng Nuai 50, a vaiin cheng Nuai 190 sanction tawh a ni a, Mizoram PWD-in an thawk mek a ni.