1010/2023-2024

Champhai, the 1st July, 2023: MZP Hqrs. Champhai, MSU Hqrs. Champhai, Govt. Champhai College SU, 04 Bikers leh 04 Bikers Girls Mizoram-te tangkawp buatsaih, Manipur ram buai avanga sahimna zawnga Mizoram pantute chhawmdawlna vehbur khawna Charity Ride a chhuak turte chu vawiin chawhma dar 11 khan Champhai District Bawrhsap Pu James Lalrinchhana chuan DC Pisa tual atangin a vailiam.

Charity Ride pual program tawi buatsaihah District Bawrhsap Pu James Lalrinchhana chuan inunauna leh thawhhona tha tak hnuaia midangte tana malsawmna ni tura pen chhuakte fakawm a tih thu a sawi a. Nizan thlengin Champhai District-ah Manipur atanga sahimna zawnga lokal mi 340 an awm tlin thu leh a zat a danglam ve reng thu a sawi a. Tun dinhmunah a hranpaa camp din a la nih loh thu leh hmun thenkhatah erawh ruahmanna siam mek a nih thu a sawi bawk.

Kalkhawmte chu 'Nang malsawmna ni ang che' tih nunpui tlat turin a chah a. Mahni inlum tlansan sahimna zawngtute lainatawm a tih thu leh chhawmdawl kawngah tanrual thiam a tul thu a sawi a. Thil tha duh vek kan nih angin tumna nen theihtawp kan chhuah tlan a tul a ni, a ti a. Champhai District chhunga ruihhlo do kawnga hmalak dante tarlangin, thalai kalkhawmte chu an thalai puite ruihhlo leh a kaihhnawih laka an fihlim theih nana zirtirtu star campaigner tha tak nih tum turin a fuih a. Ruihhlo aia thil tha leh duhawm buaipui tur a tam lutuka kan rui ve hman tawh lo tih thupui puangzartu nih tum theuh turin a chah a. Khawtlang leh District tana thil tha ngaihtuahnaa an neihte District Administration hnena thlen hreh lo turin a sawm nghal bawk.

Thusawitu dang Sub Hqrs. YMA Champhai President Pu F.Lalrinmuana chuan hriselna leh theihnate midang tana luanchhuah nana hman chhuah chu malsawmna a nih thu a sawi a. Tanpui ngaite tanpui duhna neia Charity Ride-a tel tuma penchhuak thalaite fakawm a tih thu a sawi a. Ruihhlo do kawngah lungrual taka tanho a pawimawh thu sawiin, dik taka hausak a hlut rualin dan lova thil tih hmanga hausak erawh a tlo loh thin a ni, a ti a. Dik tak leh rinawm taka hnathawk thin, ngaihsan tur dik takte ngaihsanna chang hriat a tul thu sawi a. Ram leh hnam ei chhe mektu ruihhlo do kawnga nasa zawka inkau theuh turin kalkhawmte a sawm a ni.

He hun hi Lalruatchhunga, Asst. Secretary, MSU Hqrs. Champhai chuan kaihruaiin Ralte Zodingliana, Joint Secretary, MZP Hqrs. Champhaiin thu a sawi bawk.

Charity Ride neih zawhah hian vawiin chawhnu khan Zote Community Hall-ah Lalpianpuia, Vice President MZP Hqrs. Champhai kaihhruaiin sum khawn tlingkhawmte inhlanna hun hman a ni a. Pu Ngurhmingliana Sailo, 04 Bikers Adviser-in report a pe a. He hunah hian Zairempuia, General Secretary, Govt. Champhai College Students' Union leh Zote VCP Pu RC Rodawla te'n thu an sawi bawk.