1009/2023-2024
Kolasib dated 1st July 2023: Nizan khan I&PR Conference Hall, Kolasibah Mizo Zirlai Pawl, Kolasib Headquarters chuan Remna Ni 2023 lawmna hun an buatsaih a. Pu K.Lalrinliana, Minister, Food, Civil Supplies & Consumer Affairs Department chu Khuallian niin Pu John LT Sanga, Deputy Commissioner chu khual zahawm a ni a. Pu C.Zomuanpuia, Adviser, MZP Headquarters, Kolasib chuan Resource Person niin a telpui bawk a ni.
Minister Pu K.Lalrinliana chuan Mizoram mipuiin ṭam avanga harsatna nasa tak an tawh laia Sawrkar auh ei nan ṭam do pawl din a nih dan te, chumi aṭanga hnam movement pian chhuah dan leh Sawrkar laipui nen a indawrna hrang hrang kalpui a nih dan a tarlang a. Remna leh muanna sual chhuah a nih theih nana hmalakna hrang hrangah hian kohhran, tlawmngai pawl leh Mizo zirlai pawlte an ṭangkai thu sawiin ram buai ber ni ṭhin kha tun ah chuan ram ralmuang ber a nih phah tak thu a sawi. Remna hlut zia hre thar zel turin leh remna leh zalenna a awm zel theih nan zirlaite chuan an zirna kawngah ṭhahnemngai tak a ram leh hnam hmangaihna leh tih hmasawn duhna nen zirna kalpui turin Minister chuan a chah bawk a ni.
Khual zahawm Pu John LT Sanga, Deputy Commissioner chuan remna siam tur a Mizoram mipui tawrhna nasa tak a thlawn loh nan remna leh zalenna kan hlut thiam zel a pawimawh thu sawiin khawvel ram hrang hrangah remna a awm loh avangin tun ah buaina nasa tak an hmachhawn mek thu a sawi a. Kan ram ah remna a awm chhunzawm zel theih nan zirlaiten remna an hlut thiam a, ramin hmasawnna hmel thar a hmuh zel theih nan thiamna chhawr tlak an zir chhuah a pawimawh thu a sawi.
Pu C.Zomuanpuia, Adviser, MZP Headquarters, Kolasib chuan zirlaite fuihna thu sawiin eizawnna nghelnghet nei tur a teirei peih a pawimawh zia te, zirna a hlawhtling tur chuan ruihhlo lak a fihlim a ṭul thu te, mizo ṭawng ziak leh chhiar hman dik intihhmuhte a pawimawh thu a sawi.
Pu F.Zatawn, Ex-MNA, Ṭumpui, Kolasib chuan remna a awm theih nana hnam sipai leh mipui tawrhna ṭhenkhat tarlangin remna awm hnu chuan chutiang harsatna awm tawh lo a zirna an kalpui thei te, zalen tak a an khawsa thei ta chu lawm nachang hre turin leh remna leh zalenna hlut nachang hre turin a chah bawk a ni.
Remna Ni 2023 lawmna hun MZP Headquarters, Kolasibin a buatsaih hi Pu Lalrinhlua, Treasurer, MZP, Hqrs Kolasibin a kaihruai a, Pu C.Lalruatdika, President in kalkhawmte lawmna thu sawiin hnam lam te entir a ni.
Attachment
- Loading attachment...
