1008/2023-24

Champhai, the 1st July, 2023: Transport Minister Pu T.J. Lalnuntluanga chuan tukin khan National Highway (NH) 6, Dulte to Champhai kawngpui Package-III, Shri Balaji Construction Company (SBCC) in an siam mek chu Company lamin an sawm angin a hmunah tlawhin a enfiah.

Environment, Forest & Climate Change changtu Minister ni bawk Pu T.J. Lalnuntluanga chuan kawng siamtu Company-te chu Champhai mipuite'n an nghahhlelh em em NH 6 kawngpui siam hna chu zawh fel thuai a nih theih nana  chak taka thawk tur leh hna tlo leh tha, ram tana rotling tak hnutchhiah tum turin a hrilh a. Hetihrual hian environment dan ngaipawimawh turin a chah bawk a. Kawng laih thar dunga thingphun dan tur chungchang pawh a sawipui bawk.

Minister Pu T.J. Lalnuntluanga hi Pu Rajesh Puniya, Project Director, Shri Balaji Construction Company leh a thawhpuite'n lo dawngsawngin, Khawzawl leh Champhai inkar kawng siam mek an enpui a. Fur lai a nih avanga leimin neuh neuh a awm thu leh duh anga chaka hnathawh a harsat rih thu an lo thlen a. Kumin furpui a zawh hunah Khawzawl leh Champhai inkar kawngpui siam mek chu zawhfel hman an tum thu an lo hrilh a ni.

Shri Balaji Construction Company (SBCC) te hian NH 6 Dulte to Champhai huamchhung Package-III, Khawzawl leh Champhai inkar Km 26.78 a thui, cheng vaibelchhe 370.43 senna tur an siam mek a ni.