1007/2023-24

June ni 30, 2023: Zanin khan Chief Minister Pu Zoramthanga chu Remna Ni 2023 puala Mizoram Zirlai Pawl (MZP) in Vanapa Hall-a inkhawm an buatsaih ah khuallian niin hun a hmanpui.

Chief Minister chuan MZP in Remna Ni puala hun an buatsaih chu lawmawm a tih thu a sawi a. Remna thuthlung ziah zan tluka mipui an hlim leh lawm kha Mizoramah sawi tur a la awmlo tia sawi thin a nih thu leh, hun kal zelah erawh chhan hrang hrang avangin remni ni pawimawhna a lo chul zel tak thu a sawi a. Tun hnu ah Remna Ni pawimawhna chuai tan tawh leh hnam thinlung uai thla rawn nawrkang tute chu thangtharte, zirlai te, kan thalaite an ni, a ti a. Remna nei tura kalkawng biboh tak leh harsa tak te, thil thleng tam takte chu sawi zui a hlawh lohva emaw, ngaihpawimawh a nih loh chuan kan history a thil pawimawh tak chu engmah lovah a chhuah theih laiin, thahnemngai taka thang lo thar leh zel te'n hnam chanchin leh hun kal tawh a thlir let a an hriatthiam theih tura ruahmanna an lo siam chu ropui a tih thu sawiin MZP chuangah lawmthu a sawi.

Pu Zoramthanga chuan hnam thinlung put hi ram hung nan, kan him nan a pawimawh a ni tiin, ramin hun khirh a tawn changin a lo fiah zual thin thu a sawi a. Hun in a finfiah tawh kum 37 zet lo ding nghet remna Mizoramin a neih chu a tluk zo kan chhehvelah emaw India ramah a la awm loh thu a sawi a. He kan remna hi entawn atan, khawvel hmun dangah pawh kan kalpui zel theih nan, tlansan lovin Pathian in a duh anga a kaihhruai turin i awm tlat ang u tiin mipui a sawm a ni.

Zanin programme buatsaihtute hian rambuai laia remna zawnga kohhran hruaitute'n theihtawp chhuah a tha an thawh avangin MKHC hnenah chawimawina an hlan a ni.

MZP President Pu Lalnunmawia Pautu chuan thu a sawi bawk a. Inkhawm hi Vice President Pu Andrew F. Lalramnghaka huan kaihruaiin General Secretary Pu Jacob Lalmuanpuia hnen atangin report ngaihthlak a ni a. Asst. General Secretary Pu Chinkhanmanga Thomte chuan chawimawina hlanna hi a kaihruai a ni.

School hrang hrang atangin zai, lam leh lemchan te ngaihthlak a thlirho a ni a. Zirlai pawl hrang hrang leh tlawmngai pawh hrang hrang hruaitute leh political party aiawhte he programme ah hian an tel a ni.