411/2024-2025

Champhai, the 3rd May, 2024: Champhai District Bawrhsap Pu James Lalrinchhana chuan vawiin chawhma khan Melbuk ram chhung Tiau lui kama awm, Uilui kaia raltlan awmna refugee camp a tlawh.

District Bawrhsap Pu James Lalrinchhana chuan an dinhmunte chiang zawka hriat tuma tlawh a nih thu sawiin, nitin khawsak kawnga harsatna an tawhte a hnena thlen hreh lo turin a chah a. Nimin lamah District Level Committee on Myanmar and Bangladesh Refugees thutkhawm a nih thu leh raltlan enkawl leh buaipui chungchangah thutlukna pawimawh tak tak siam a nih thu a sawi a. District Level Committee-in raltlante buaipui leh enkawl kawnga inkaihhruaina a siamte chu Village Level Committee te'n tha taka an kenkawh bakah raltlante'n an zawm that a tul thu a sawi a. Sahimna zawnga India ram rawn beltute chu ram dan leh inkaihhruaina siamte bakah sawrkar thupekte tha taka zawm tura chahin, dan zawm that chu mitin tana himna a ni, a ti bawk.

Pu James Lalrinchhana chuan engtia rei nge an awm dawn tih a hriat mai loh avangin raltlante chu India rama an awm chhungin khua leh tui te'n an zawm thin dante tha taka zawm turin a chah a; ralmuang taka awm tura a chah rualin ram dan zawmlote tan hmun a awm loh thu a sawi a. Dan palzuttute lakah khauh taka hmalak zel a nih tur thu sawiin, inthununna tha tak nena chenho thiam tur leh dan lova che thinte do kawngah thuneitute tha taka thawhpui turin a chah a. Raltlan zingah a bik takin hmeichhia, naupang leh rualbanlote himna sawrkarin a ngaih pawimawh thu a sawi a. Raltlante chu anmahni duat taka enkawltute hmalakna hre reng tur leh lawmna chang hriaa theihtawp chhuaha tawiawm zel turin a chah bawk.

He huna tarlan a nih danin tun dinhmunah Uilui kai refugee camp-ah hian chhungkaw 178 vel an cheng mek a. District Bawrhsap chuan Humanitarian Organisation kaltlanga chhungkaw thlan bik 23 te tana chhawmdawlna dry food ration hrang hrang sem chhuah a nih dante a hmuhpui a. Hriselna, zirna, tui, ei leh in leh pawimawh dangte pawh sawiho a ni bawk.

Vawiin District Bawrhsap-in Uilui kai refugee camp a tlawhnaah hian DIRPO Dr. Lallawmkima bakah Village Level Committee on Myanmar and Bangladesh Refugees aiawhin Melbuk VC te'n Bawrhsap hi an tawiawm a ni.