444/2024-2025

Champhai, the 9th May, 2024: District Information & Public Relations Office leh District inrelbawlna kawnga pawimawhte zirchianga Champhai District-a cham mek Mizoram Information Service (MIS) Officer thar 5 te chu vawiin tlai khan Champhai District Bawrhsap mawhphurhna la mektu Addl. DC Pu K. Zorammuana chuan a Pisa-ah a kawm.

Pu K. Zorammuana chuan MIS Officer tharte tana District Office inrelbawlna leh district administration kalpui dante zirchianna buatsaih a ni chu tha a tih thu sawiin, I&PR Department chu District inrelbawlna kawnga pawimawh tak, mipuite hnena hriattur pawimawhte media kaltlanga puangzartu sawrkar kutke pawimawh tak a ni, a ti a. Champhai District chu ramri depa awm district pawimawh tak, tourism chawilar kawnga theihna nasa nei a nih thu a sawi bawk.

Hemi hnu hian DC Office peng hrang hrangte fankualpui niin hnathawh dante Pu K. Zorammuana'n a sawifiah nghal zel a ni.

MIS Officer tharte hian vawiin chawhma khan DIPRO Office, CHANEM Building Champhai tlawhin Office hnathawh leh pawimawh hrang hrangte bakah election hun chhunga hmalakna hrang hrangte an zirchiang a. DIPRO Champhai Dr. Lallawmkima leh a thawhpuite'n zirtirna hrang hrang an lo pe a ni. Hemi hnu hian ramri khaw pawimawh tak Indo-Myanmar border, Zokhawthar an tlawh nghal bawk.

MIS Officer tharte hian tukin khan MJA Press Club, Champhai tlawhin MJA President Pu Lalhlupuia leh a thawhpuite'n an lo dawngsawng a. Press Club chanchin, kalhmang leh enkawl chhoh dante an lo hrilhfiah a ni.

Mizoram Information Service 2024 batch mi 5, Pu F. Lalrinfela, IPRO, Pi F. Zodingpuii, IPRO, Pi Biaknungi, IPRO, Pu Lalzara, IPRO leh Pu N. Vahneichhi, IPRO te chuan District Office Orientation Programme nei mekin May ni 8-10, 2024 chhung hian Champhai District-ah training an nei dawn a. Kar hmasa lam kan Kolasib District-ah hun a n hmang a, ruahman dan chuan tun thla tawp hian Lunglei Dstrict an tlawh dawn bawk a ni.