4014/2022-2023

Champhai, the 28th March, 2023: Mizoram Badminton Association (MBA) leh Champhai District Badminton Association (CDBA) tangkawpte buatsaih, Mizoram Badminton Association (MBA) Finals - 2023, a tum 2-na, March ni 28 a?anga 31, 2023 thleng awh tur chu vawiin chawhnu dar 2 khan Champhai Town Hall-ah hawn a ni. He hun hi Champhai District Bawrhsap Pu James Lalrinchhana chuan khuallian ni a hmanpuiin MBA Finals 2023 chu a hawng a ni.

Khuallian Pu James Lalrinchhana chuan Champhaiin MBA Finals 2023 a thleng thei chu ropui a tih thu sawiin, intihsiakna thianghlim leh mawi tak chuan mihringte a tha zawnga a chher theih thu a sawi a. Champhaiin infiamna huanga intihsiakna lian tham tak tak tunhnaia a thleng thei chu vannneihthlak a tih thu a sawi a. Thalaite chu thiamna leh theihna an neihte tipung tura taimakna leh tuina tak tak nei turin a fuih a. Infiamna chuan ruihhlo lakah thalaite a chhanchhuah theih avangin ngaih pawimawh bik a nih thu sawiin, taksa leh rilru hrisel nan sports kan chawilar zual deuh deuh a ngai a ni, a ti bawk.

Champhai District Bawrhsap chuan Pradhan Mantri Jan Vikas Karyakram (PMJVK) kaltlangin Champhai District chhungah Badminton Court engemawzah thuamthat tuma project thehluh a nih thu tarlangin, April ni 25, 2023 ah District Sports Committee inthlanna neih tum a nih thu leh hemi kaltlang hian sports discipline hrang hrangte chak zawka khaikhawma tih changtlun tum a nih thu a sawi a. Badminton player hmun hrang hrang atanga Champhai pantute chu District mipui aiawha lawmna thu sawiin, mamawh an neihte a hnena thlen hreh lo turin a chah a. MBA Finals 2023 chuan inthianthatna leh inunauna tha zawk a siam ngei a beisei thu sawiin, thianghlim leh mawihnai taka khelh a nih theih nana duhsakna hlanin a hawng a ni.

He hun hi Pu H. Rothangliana, Sr. Vice President, CDBA chuan a kaihruai a. Pu Paul Zakhuma, Gen. Secretary, CDBA in kalkhawmte inhmelhriattirna hun a hmang a. Pu Thangkunga, Referee hnen atangin technical report ngaihthlak a ni a, hemi hnu hian MBA Finals 2023 tan nghal a ni.

Mizorama badminton thiam zualte inelna MBA Finals, 2023 ah hian senior player category hrang hrang 5; Men's Singles, Men's Doubles, Women's Siingles, Women's Doubles leh Mixed Doubles huanga Top 8 chinte an tel a. MBA Finals 2023, a tum 2-naah hian badminton player 30; mipa 18 leh hmeichhia 12 te an tel thei a ni.