Election Commision of India in ruahmanna a siam angin ramchhung hmundang rualin vawiin chawhma khan Champhai District Election Officer leh DC ni bawk Pu H. Lalengmawia chuan Champhai District atan National Electoral Roll Purification and Authentication Programme (NERPAP) chu a tlangzarh. Pu H. Lalengmawia chuan Election Commission of India-in Electoral Roll dik leh felfai neih a ngaihpawimawh thu leh chumi avanga he hmalakna hi duan tak a nih thu a sawi a ni.

Champhai DC chuan inthlang ram kan nih avangin a thlangtute hi ram inrelbawlnaah an pawimawh em em a. Ram hruaitu thlang theitu diktak nilo, ram khua leh tui niloten vote an lo thlak emaw, roll felfai tawklo hman a nih chuan democracy dik tak din a ni thei dawnlo a ni a ti a. Electoral roll rintlak leh fel tak siam tur chuan Election Branch chauh nilovin mitinin mawhphurhna an neih thu Pu H. Lalengmawia chuan tarlangin, he programme hmalakna turah pawh Political Party tin te, NGO-te, Media-te leh Official hrang hrangte tawiawmna a ngen nghal a.

NERPAP tlangzarhna inkhawm hi Election Officer Pu Benjamin Lalzama'n kaihruaiin, he programme-in a thiltum tlangpuite a tarlang a. Elector-te EPIC Data leh Aadhar Data thlunzawm te, elector hming hmun khat aia tamah roll-a an hming chuang ten an mahni chungchang thu an hriattir theihna tur leh chung thil te chu an mahni bialtu ERO-ten ni 15 chhunga lo chinfel tur thu te, Electoral Roll-a Elector-te hming, pa hming, kum leh a dangte document an neih dan mil a siamthat sak te he programme-ah hian a tel a. Awareness programme leh special camp buatsaih tur ruahmanna te a tel bawk a ni.

Vawiin hunah hian District Election Branch-a official leh thawkte bakah party aiawhte, tlawmngai pawl hrang hrang hruaitute leh media lamte an kalkhawm a ni.