Mizoram State Tobacco Control Society chuan vawiin chhun dar 12 khan ATI, New Secretariat Complex Conference Hall - I ah Governing Body Meeting vawi 11 na an nei.

Pu Arun Goyal, Principal Secretary, Health & Family Welfare Department, Mizoram chuan meeting hi kaihruaiin meeting hmasa lama an thu delhkilh leh hmalakna te, zuk leh hmuam do kawnga tanlak dan hrang hrang thlir ho nghal a ni.

Dr. Jane R. Ralte, Member Secretary, MSTCS chuan report pein zuk leh hmuam do kawnga hmalak tawh leh hmalak dan a sawi a. February 2014 atanga February 2015 inkarah hian training vawi 40, workshop leh campaign vawi 96, talk show vawi 54 leh Anti Tobacco Squad Drive vawi 117 neih anih dante sawiin MBSE Syllabus ah Class VI & VII ah tobacco control lam hawi telh a nih thu a sawi a. World No Tobacco Day 31st May a hman thin anih dan report a pe bawk. GATS-Global Adult Tobacco Survey a a landanin India rampuma States leh UT hrang hranga zuk leh hmuam ti nasa tehna ah Mizoram chu sang ber a ni a, Goa a hniam ber a ni.

Pi Lal Riliani, President, ISTH Mizoram Chapter chuan meizuk that loh zia leh meizuk in mihring hriselna a khawih pawi theih zia puanzarna kawngah hun rei tak atanga an lo beihna chu a hlawhtlinna tunah langtanin mi tam takin an thlawpna ah leh Sorkar-in kut leh ke anga hmanga, sorkar programme ah pawh telh a ni chu lawmawm a tih thu a sawi a. Lehkhathiam zawk leh mi changkang tena zuk leh hmuam that loh zia puanzar kawnga hma an lakpuina ah leh thu tha tak tak sawiho a ni thin chu lawmawm a tih thu sawiin puipunna ah pawh meizu hmuh tur an van tawh thu a sawi bawk.

Mizoram State Tobacco Control Society te hian kum 2009 atang khan Bloomberg Initiative atanga funding an hmuh atangin Vaihlo leh a kaihnawih dona kawngah ke an lo pen tan tawh a. National Tobacco Control Programme (NTCP) pawh Ministry of Health & Family Welfare atanga fund hmu in kum 2009 atang khan Mizoramah District pahnih, Aizawl leh Lunglei ah te Tobacco Cessation Clinic (TCC) neiin kalpui a ni.

Heng Society leh Programme atang te hian hna kawng hrang hrang in an thawk nasa hle a thla tin hian activities 45 vel nei ziah ang an ni. Tobacco Quit rate hi tunah hian 12.02% a ni a, hetih lai hian National quit rate hi 5% vel a ni.

Tobacco Cessation Clinic hi Aizawl Civil Hospital, Lunglei Civil Hospital leh State Referral Hospital Falkawnah te an awm a. An ni hian counselling bakah Nicotine Replacement Therapy (NRT) hrang hrang hmangin Vaihlo sim duh te an lo tanpui thin a ni. Tunah hian Vaihlo simna atana puitu damdawi thial chi Nicotine Gum leh ei chi Bupropion te an hmang mek a, heng damdawi te hi vaihlo sim duh te tan a tangkai hle a ni. Tunah hian taksa a bel chi Nicotine Patch pawh enchhin tan mek a ni bawk. TCC ten tun thlenga Vaihlo sim duh clients an neih zat chu mi 8414 an tling tawh a ni.

Vaihlo khuahkhirhna dan COTPA kenkawhna kawngah Anti Tobacco Squad District tinah din a ni a, an ni hian hma nasa takin an la mek reng bawk a. Hei bakah hian Vaihlo hman kawnga kan dinhmun zirchianna Research leh Compliance Study te an nei reng bawk a ni.

Attachment

  • Loading attachment...