3479/2022-2023

Champhai, the 6th February, 2023: Champhai District Bawrhsap Pu James Lalrinchhana chuan inrinni khan North Khawbung khua tlawhin VC leh NGO te kawmna hun a hmang a; North Khawbung khua leh a chhehvela pipu sulhnu, khawtlang leh Sawrkar hmunhma pawimawhte tlawhin thawktute kawmin mamawh leh tul dangte a sawi pui bawk.

District Bawrhsap Pu James Lalrinchhana chuan North Khawbung khawtlang hruaituten khawtlang mamawh leh tulte theihtawp chhuaha an ngaihven thin leh, an khua leh a chhehvela pipu sulhnu pawimawh tak tak humhalh kawnga an hmalaknate chu fakawm a ti a. Khawtlang hmasawnna turte Office-a dawhkan kil hova sawi mai lova, a hmun ngeia kalchilha hmalak tulte enfiah tluka tha a awm lo a ni, a ti a. Sawrkar hmalaknate khawtlang mipuiten tha taka an thlawp a pawimawh thu a sawi bawk.

Khawtlang mamawh leh tulte vawilehkhata tihhlawhtlin vek theih anih loh thu sawiin, khawtlang tana tha tur ang zela hmalak a pawimawh hmasa a ni, a ti a. Khawtlang hruaituten sawrkar hmunhma cheibawl leh enkawl kawnga neitu thinlung an pu thin chu fakawm tiin, thawhhona tha tak vawngnung zel turin a fuih a. Zirna chu a bulthum atanga uluk taka kalpui a tul thu sawiin, hmasawn zawnga kal tura ngaihtuahna thar leh tha zawkte ngaihtuah fo thin turin Zirtirtute a chah a. Khawtlang hruaitute chu sawrkar thupek leh hriattirna chhuahte tha taka kengkawh tur leh mipuite zirtir kawnga tan la turin a chah a. Dan lova thil tih ven leh man chhuah kawngah theihtawp chhuaha sawrkar tawiawm tlat turin a sawm bawk a. District nuam leh ralmuang, ruihhlo laka fihlim, intodelh, zirna, hriselna leh infiamna kawnga khawtlang leh district hmasawn siam kawnga tanrual puiah District mipuite a sawm bawk a ni.

District Bawrhsap chuan a remchan dan angin North Khawbung khuaa Anganwadi Centre, Sub Centre leh Zirna in hrang hrangte a tlawh a; inenkawl dan, ei leh in dawn thinte, PM Poshan, Nutrition Garden, SMC/SMDC chungchanga hmalaknate a enfiah a. Zirtirtute chu ruihhlo leh a kaihhnawih laka zirlaite an fihlim theih nan leh sual kawng an zawh loh nan an tualzal nun thlenga chik thin turtein a chah a. Thiamna pek mai bakah an thlarau lam nunte thlenga hruai dik tura tan la turin a chah a. Mathematics leh Science-te chu a theih chen chenah Mizo tawng ngeia zirtir thin tur leh hriat thiamna tak tak, mahni irawm chhuak ngeia an chhan theihna lam hawia zirtirna kalpui tam turin a fuih a. Zirna in leh a bulhnaia vaihhlo leh a kaihhnawih khawih leh zawrh anih loh nana hma la turin a chah nghal bawk.

Heng bakah hian Centrally Sponsored Scheme, Pradhan Mantri Awas Yojana - Gramin (PMAY-G) kaltlanga insakte a enfiah a. Govt. Fair Price Shop-te pawh tlawhin a him leh him lohte, buhfai neih dan, buk dan leh buhfai quality-te, sem chhuah dan leh e-POS Machine hnathawh dante a enfiah a. North Khawbung khua leh a chhehvela pipu sulhnu leh khualzin hip theihna tura hmunhma pawimawhte a tlawh bawk a. Khawbung tlanga pipu sulhnu hrang hrangte, Lalruanga Lung leh Far Park-te tlawhin humhalh leh cheibawl zel kawnga hmalak theih dan tur khawtlang hruaitute nen an enho a ni.