3480/2022-2023

Ramtuk thla ni 6, 2023: Vawiin khan Lawngtlai District Level Committee on Fire Prevention (DLCFP) huaihawtin Fire Prevention Week (Kangmei Ven Hapta) 2023 hawnna hun chu Lawngtlai DC Conference Hall-ah Lai Autonomous District Council (LADC)-a Chief Executive Member (CEM) Pu V. Zirsanga hovin hman a ni.

LADC CEM Pu V. Zirsanga chuan kangmei chhuakin ramngaw leh leilung tichhia a, nungcha leh mihringte ei leh bar thar chhuahna a nghawng bakah, boruak a tibawlhhlawh tih sawiin, ram kang venna kawngah sawrkar, pawl leh mimal te'n mawhphurhna leh chanvo kan nei ṭheuh tih a sawi a. Kangmei chhuak tam ber chu mihringte fimkhur tawk loh vang a nih thu sawiin, nasa taka inzirtir a la ṭul tih a sawi a. District chhunga huan leh lo neitute chu ṭha taka mei lam sial tura chahin, District mipuite chu ni tin khawsak phungah kangmei tichhuak lo tura fimkhur turin a chah a, kangmei ven kawngah sawrkar leh tlawmngai pawlte nen pheikhai rual taka ṭang tlang turin a chah bawk.

Kangmei Ven Hapta hawnna hi Lawngtlai Additional Deputy Commissioner Pu Abraham Beirazi Khithie chuan kaihruaiin, Lairam Christian Medical Centre & Hospital-a Chaplain Rev. C. Ngurengmawia chuan hunserh a hmang a. DLCFP Member Secretary, LADC-a District Council Conservator of Forests Pu K. Lalromawia'n report pein, mipui kal khawmte chuan ram tikang lo tur leh mi dangte zirtir tura thutiam an sawi rual a. Lawngtlai District Village Council Association President Pu Elvis Lalthangzuala hnen aṭangin thu sawi ngaihthlak ni bawkin, Lawngtlai District Rural Development Office-a Project Director Pi Marilyn Rualzakhumthangi chuan lawm thu sawiin hun a khar a ni.

Vawiin Fire Prevention Week hawnnaah hian LADC Chairman Pu VL Hmuaka bakah, state leh LADC hnuaia official te, VC leh tlawmngai pawl ai awhte leh chanchinbu mite an tel a ni.

Kumin Fire Prevention Week hian February ni 6 - ni 10, 2023 chhung a awh dawn a. Thupuiah, "Thapui thawhin kangmei chhuak tur i veng ang u" tih chu thlan a ni. Week chhung hian Lawngtlai District chhungah kangmei venna lam inzirtirna (awareness campaign) uar zawka kalpui turin VC leh tlawmngai pawlte nen thawk hovin department lamin hma an la dawn a. Inzirtirna atan hian media kal tlangin panel discussion tihchhuah niin, video clip siam leh thuziak (hoarding board/poster) tar te kalpui a ni dawn bawk a ni.

Fire Prevention Week hi Mizoramah kum 2000 aṭang khan hman ṭan niin, kumin hi a ṭum 24-na a ni a. Kum 2009 aṭang khan district leh village level fire prevention award sem ṭan niin, Mizorama district hrang hrang zingah Lawngtlai District hi kum 2010 & 2015-ah pakhatna, kum 2019-ah pahnihna leh kum 2014-ah pathumna a lo ni ve tawh a ni.