3481/2022-2023
Aizawl, 6th February, 2023 : Parliament session neih mekah vawiin khan Mizoram Rajya Sabha MP Pu K.Vanlalvena zawhna te Union Minister pahnihin ziakin an chhang a. Union Minister of Petroleum and Natural Gas Pu Rameswar Teli chuan Pu Vena zawhna chhangin Kolasib District Meidum khuaah January ni 5, 2012 ah ONGC ten Natural Gas an hmuchhuak tih a sawi a.Amaherawh chu tun thlengin lak chhuah hna thawh a la ni lo, a ti. Petroleum and Natural Gas changtu Minister hian Pu Vena zawhna dang chhangin Sihhmuiah Oil Depot siamna atana ram an en chu a hmun a tha tawk tih Indian Oil Corporation Ltd(IOCL) ten report an pek tawh thu a sawi a. Oil Depot siam hna chu Mizoram sawrkarin land acquisition an tih fel hma leh hma lovah a innghat a ni, a ti.

Vawiin Session ah chuan Union Minister of Jal Shakti Pu Bishweswar Tudu chuan Pu Vena zawhna chhangin Mizoram thingtlang khaw hrang hrangah van ruahtui khawl khawmna atana tuikhuah leh dil siam hna thawhna atan PMKSY Scheme hnuaiah a thawh khatna ah kum 2015 atanga 2021 chhungin Cheng Vaibelchhe 282.16 pek a ni tawh tih a sawi a. Rain water harvesting thawh hnihna atan cheng Vaibelchhe 28.44 chu 2022 chhungin Mizoram sawrkar hnenah pek a ni tawh bawk a ni.

Tun Parliament Session neih mekah hian zawhna tenau deuh te tiamin, Minister hrang hrang 20 te hnenah Pu Vena hian zawhna 63 a theh lut a ni.