3482/2022-2023
Mamit 6th February, 2023 : Vawiin khan Fire Prevention Week, 2023 Mamit District hawnna District Level Fire Prevention Committee bultumin Chhimveng YMA Hall-ah neih a ni a, Pu Lalnunhlua, Chairman DLCFP/District Bawrhsap chuan khuallian niin Week hawnna a nei.

District Bawrhsap chuan kangmei veng turin neitu rilru kan put a pawimawh thu a sawi a, ramkang chungchangah mimal huan kang chu a tlem zawk thin thu sawiin, hei hian a entir chu enkawltu neiah kangmei a chhuah khat vang a nih thu leh kangmei venna kawngah mitinte'n mawhphurhna kan lak ngam a tul thu a tarlang chiang hle a ni a ti.

Ramkangin kan ram a tihchhiat pawi theihzia hre chunga, theihtawpchhuaha kangmei veng turin kalkhawmte leh District mipuite a sawm a ni.

He hunah hian Pi Jenny Sailo, Member Secretary, DLCFP/DFO chuan report pe-in Kum 2022 chhungin Mamit District chhungah Ramkang hmun 11, Lo/Leipui/Huan/ Bawlhlawlh kang hmun 523-ah awmin avaiin 1012.3 hec ramkang a awm thu a tarlang a, kumin 2023 thal kan lo thleng chho leh ta a, Huan/Lo ram hal turte leh District chhung mipui zawng zawngte kangmei ven kawngah nasa lehzuala tan la a, theihtawpchhuah turin a ngen bawk a ni.

Kumin Fire Prevention Week thupui a tan hian " Thapui thawhin kangmei chhuak tur i veng ang u" tih chu hman niin Week hi Ni 6-11 February chhung hman a ni ang.

Fire Prevention Week hawnna hun hi Pu K. Lalmuankima, Honarary Wildlife Warden, Mamit District chuan kaihruaiin Pu Vanlalchhunga, President, Sub Hqrs YMA leh Pu H. Rodingluaia, President, Jt VC Mamit te'n thu an sawi a. Pu F. Vanlalsawma, RO Mamit pawhin lawmthusawina a nei bawk.

He hunah hian Mamit khawpui chhunga Heads of Offices, Zirna lama thawktute, khawtlang hruaitu, tlawmngai pawl aiawhte leh Department Officials te an tel a ni.