3483/2022-2023
Dated Serchhip, the 6th February, 2023: Vawiin khan Kangmei Ven Hapta, 2023 hawnna inkhawm Serchhip DC Conference Hall ah buatsaih a ni a, Pi Nazuk Kumar, IAS, Serchhip Bawrhsap chu khuallian a ni.

Pi Nazuk Kumar chuan, kum kaltaa Serchhip district in kangmei veng tha ber lawmman kan lakna leh a hnu zela hna kan thawhzuinaah te kha mahni emaw min tlemte te thawhchhuah theih a ni lova, kan district chhunga mitinte inpekna leh thawh hona tha tak vang a ni a, vawiinah hian lawmthu ka sawi thar leh a ni. Kuminah pawh pakhatna ni leh thei tura theihtawp chhuah tlang leh turin ka sawm cheu a ni, a ti a. Ram kang hian thil tha engmah hrin chhuah a nei lova, kan rohlu neihsa te min chhuhsak thin zawk a ni. Ram kan duhzual hun hi Fur lo thlen hma thla li chhung vel a ni ber a, hemi chhung chauh hi chu khawtinten nasa takin, fimkhur takin kan ramte i thlithlai ang u, a ti. Kumin hi boruak a kal dikin kangmei a chhuah loh nan kan dinhmun a tha dawna ka hriat avangin kan invena kangmei kan tihchhuah loh nan ka tawngtai a ni, a ti bawk. Industry lamah kan la san loh avangin Lo neia eizawng kan la tam a, Lo hal hun kan bithliahte tha taka zawmin, Lo hal turten tha takin Mei kawng kan sial ngei bawk dawn nia. Hei hi thupeka tihchhuah a nih avangin a zawm lote chuan hremna an hmachhawn dawn a ni, tiin Lo leh Huan hal hun bituk zawm theuh turin mipuite a chah bawk.

He hun hi Pu PC. Vanlalluna, Secretary, Sub Headquarters YMA in a kaihruaia, Pu Lalbiakchama Chawngthu, DFO, Thenzawl leh Member Secretary, Serchhip District Fire Prevention Committee hi kangmei venna lama hmalak dan tlangpui sawifiahna a nei a ni. Forest Survey of India in kum hnih dan zela zirchianna report a siam, a hnuhnung ber 2021 kuma siam ang chuan Mizoram ramngawin a khuh zau zawng chu 84.53% a ni a, ngaw chhah bik chin chu 0.74% chauh niin heng hmunte hi kan humhalh bik Murlen, Thorang, Zongaw, Phawngpui ang chite an ni a, Open Forest khuh chin hi 56.68% a ni. Heti chung hian India rama ramngaw nei tha ber State kan la ni. Kan ramngaw leh a chhunga cheng nungchate nasa zawka humhalh anih theih nan kum 2000 ah khan State Level Fire Prevention Committee leh District Level Committee din niin anni hmalakna hian kumtin Kangmei Ven Hapta hi hman thin a ni a, kumin hi a tum 24 na a ni. Forest Survey of India hian kangmei chhuak report hi a en reng a, an Satellite hmangin tuala kan Vawkchaw chhum thlengin an rawn hmu thei a ni. Kum 13 kal ta chhung khan Mizoram hian ram kang report kan ngah ber char char a ni. Hetiang taka kangmei chhuak kan ngah chhan hi kumtin Lo leh Huan kan la hal vang a ni ber. Forest Survey of India in kangmei chhuahna hmun hluarna bik a chhinchhiah danin Mizoram chhungah chhim thlang lam, Chakma Autonomous District Council leh a chhehvel te a sang fal hle bawk. Kum 12 chhunga Serchhip District dinhmun bikah 16.08 sq km hi ngaw chhah bik a la awm a, district sawmpakhat zinga a nei tlem ber Champhai District dawttu a ni. Tunah hian Forest Survey of India report 2023 buatsaih leh mek a ni.

Kangmei Ven Hapta chhung hian kangmei tichhuak lo tura inzirtirna leh hmalakna chi hrang hrang kalpui a ni dawn a, kumin Hapta thupui hi “Thapui thawhin kangmei chhuak tur i veng ang u” tih a ni.

He hunah hian Pu Lalzuiliana, President, Serchhip District VC Association pawhin thusawina hun a hmang a, Pu C. Lalhminghlua, President, MJA Serchhip District kaihhruaiin kal khawmten ramngaw leh nungchate duat taka enkawl turin thu an tiam a, Pu C. Lalkhawthanga, DFO, N. Vanlaiphai chuan lawmthu sawiin inkhawm a khar a ni.