1785/2022-2023
Champhai, the 1st September, 2022: Chaw tha leh hrisel ei inzirtir uar thla, Poshan Maah - Nutrition Month, 2022, September thla chhunga Champhai District chhunga kalpui tur chu vawiin chawhnu dar 1:30 khan District Bawrhsap, Pu James Lalrinchhana chuan I&PR Conference Hall-ah a hawng.

Bawrhsap Pu James Lalrinchhana chuan ram hmasawn leh changkang ni turin a chhunga chengte hriselna a pawimawh hmasak thu sawiin, ram a hrisel chuan sum leh pai dehchhuah a tam a, ram a thang nasa thin a ni, a ti. Thingtlang mai nilo khawpuia chengte thlenga chaw tha mamawh tur ang dawnglo an awm thute, tanpuina leh zirtirna zau zawk kalpui a tul thute tarlangin, naupang kum 6 hnuai lam, hmeichhe tleirawl, naupai leh naupawmte chu Poshan Maah kaltlanga ngaihven zual bik ngaite an nih thu a sawi a. Chaw tha leh hrisel ei uar tura inzirtirna Poshan Maah - Nutrition Month, September thla chhunga kalpui turah theihtawp chhuaha hmalak a tul thu sawiin, Poshan Abhiyaan chu program mai ni lo, mipui huapzo tanrualna leh thawhhonaah chang se a duhawm thu a sawi bawk.

Pu James Lalrinchhana chuan eitur hrisel, tha leh thianghlim ei tura inzirtir kawngah line department hrang hrangten zirtirna an kalpui tam deuh deuh a tul thu sawiin, nun kawng hrisel leh dik inkawhhmuh tam deuh deuh pawh a tul tel a ni, a ti a. Nu hnutetui hnek, thlai hring leh thei ei tam tangkaina sawiin, naupai, naupawm leh naupan laia inenkawlna tha dawngte chu an thanlen zelna kawngah an ngaihtuahawm lo tlangpui a ni, a ti a. Chaw hrisel hmanga rilru leh taksa hrisel neih a nih theih nante, District hrisel, State leh ram hrisel zawk siam a nih theih nan Poshan Maah- Nutrition Month hnuaia hmalakna turte chu duhsakna hlanin a hawng a ni.

Hawnna hun hi Pu Lalrinmuana, District Programme Officer (WCD) chuan a kaihruai a. Pu Lalmuansanga Hnamte, District Coordinator (Poshan Abhiyaan) chuan report tlangpui a pe a, a kaihhruaina hnuaiah Poshan Maah thu tiam lak a ni a. He hunah hian chaw tha leh hrisel ei tangkaina bakah Poshan Maah chhunga hmalak dan tur chungchangte sawiho a ni bawk.

Rastriya Poshan Abhiyaan (National Nutrition Mission) scheme hi kum 2018 September thla khan bultan a ni a. He scheme hi Ministry of Women & Child Development hnuaia din a ni a. Poshan Abhiyaan hmang hian India rama naupang than thute, an kum leh an rih zawng inmil lo lutukte, an san zawng leh an rih zawng inmil lo lutukte nuaibo tum a ni a. Nu-in nau a pai leh pawm laia inenkawlna tha leh eitur tha a hmuh theihna turin hmalak thin a ni a. Poshan Abhiyaan hmang hian ICDS hna lo thawh tawh sa chu thuam chak a ni a, Anganwadi zawng zawnga raipuar, naupang leh naupawm inziaklut zawng zawngte chu uluk lehzuala vil an ni a. Hemi bakah hian nakin lawka nu la ni mai tur hmeichhe tleirawlte pawh he scheme hian a huam tel bawk a, an tleirawl lai atanga thisen tlakchhamna laka an him theihna atan hmalakna kalpui a ni bawk.

Poshan Abhiyaan hnuaiah hian kum tin September thlaah Poshan Maah -Nutrition Month, chaw tha leh hrisel ei inzirtir uar thla hman thin a ni a. State level, district level, block level leh village level-ahte he hun hi hman thin niin, Poshan Maah chhung hian ei tur tha ei pawimawhnate, tui thianghlim in pawimawhnate leh kawng hrang hrang hmanga inzirtirna hun hman thin a ni a. Champhai District-ah chuan kawngzawh, video clip insiamsiak, chaw tha ei leh tui thianghlim in chungchang inzirtirnate, nu hnutetui that bikna chungchang leh pawimawh hrang hrangte inzirtirna hun hman tum a ni.