1786/2022-2023
Aizawl the 1st September, 2022 : Vawiin khan Hnahthial District atan Family Oriented SEDP Launching Programme chu Electric Veng Community Hall, Hnahthial-ah neih a ni a. Health and Family Welfare Minister Dr. R.Lalthangliana chu khuallian niin, Family Oriented SEDP Programme hi Hnahthial District tan a hawng nghal a ni.

Khuallian Dr. R.Lalthangliana chuan Family Oriented SEDP Launching Programme chu State Level-ah August ni 19 khan Vanapa Hall ah Chief Minister Pu Zoramthanga hova hawn a ni tih a sawi a, Cabinet thu thlukna anga vawiina Hnahthial District-ah pawh hawn a ni thei chu lawmawm tiin, Community Hall khat tak meuh mai mipui kalkhawm leh a pawna thu te zawng zawng hnenah chibai a buk a, kal tha ber District an ni hial awma a rin thu a tarlang a. Khuallian chuan SEDP tobul hi kan hriat angin tun sawrkar a lo pian hma, kum 2014 bawr chho-ah Pu Zoramthanga hova buaipui chhoh niin, SEDP duanchhuah a nih theihnan Drafting Committee din a ni tih a sawi a, chumi atan chuan Chairman a ruat a nih thu tarlangin, mithiam leh University atanga heti lama ngaihtuahna seng thiam leh seng mi te rawn chungin kum 4 dawn lai chhungin vawi 30 chuang meeting lian tak tak neih a nih thu a sawi a, heng meetingah hian SEDP huang chhunga ngaihtuahna bing taka hmang turin study cell siam chhawn a nih thu leh, mawhphurhna hrang hrang nei a inthenin chutiang chuan SEDP hi duanchhuah a ni thu a sawi a. Dr. R.Lalthangliana chuan SEDP duanchhuah kawnga an theihna zawng zawng senga, an hun leh tha tam tak sengtu vawiina MLA te Pu Lalmuanpuia, Prof F.Lalnunmawia, Dr. Vanlaltanpuia leh midangte chungah lawmthu a sawi a. Kum 2018-ah SEDP tlangzarh a nih a, tun sawrkar a lo din hian SEDP chu sawrkarin chhungkua mimal kut hnathawk a eizawngte dawmkan nan leh lei rem an rah theih nan flagship programme pawimawh tak a lo ni chho a, SEDP hian area hrang hrang huamin, ram hmasawn nana thil pawimawh em em pahnih Education leh Health sector pawh zau taka huamin, zir tham tling programme a nih angin kum 2019 ah khan a English Version pawh hnamdangte tan buatsaih a nih thu a sawi a. Amaherawhchu hetia hun ralmuang tak kan hman lai hian Covid-19 hripui a lo leng thut mai a, 2020 kum tir atangin ram a buai a, Covid-19 in khawvel pum a nuai a ni tih kan hre theuh a, kum 2 leh a chanve chu hemi dona kawngah theihtawp chhuahin sawrkarin hma la in, state sum engemaw chen pawh covid donan hman niin, heng bakah vawk hri leng, Myanmar atanga kan unau ral tlan lo mikhual kawngah leh lirnghing-ah te sawrkar insenna tam tak a awm a ni tih hi mipuiin an hriatsaka, an hriatthiamna thui tak sawrkarin a mamawh a ni tih a sawi a. Minister chuan heng chhan hrang hrang avanga a tir atanga kalpui tur anga ruahmanna sawrkarin a lo duan chu a kalpui theilo chu pawi a tiin, sawrkar chuan theihtawp chhuah inhuam (political commitment) mah se, kan hun tawnin a zir nganglo a ni tih hi mipuiten an hriatthiampui turin a ngen tak meuh meuh a. Hetianga hun khirh tak ramin a tawn mek karah leh sumpai harsatna karah Family Oriented SEDP chu hawn ani thei hi District mipui kan vannei hle a ni tih hria a, assistance kan dawn te a tamlo a nih pawn kan hman tangkai theihdan dapin ngaihtuahna fimtak chhungkaw pa ten seng a hmalak leh hmachhawp neih a pawimawh tih hre tlat a, SEDP atanga sum an dawn te chu mipui sum (public money) a ni tih hria a, engemaw a tlak ral mai mailo turin District mipui te a ngen a. Kan thlen chin teuhah thahnem ngai takin leh a tangkai thei ang bera hmanga, SEDP la dawng zel tur lo la penchhuak tur te pawh in fimkhur takin kan tawn chinah ngaihtuahna seng turin a ngen a. A taka hlawhtlinnna nei District nih ringawt piah lamah hlawhtling tam berna District ni tura tan la teuh turin leh kan sum fai dawn te a tlem a nih pawhin uluk taka ngaihtuah a, sorkar in apawng a takin a sem a lo a ni tih hriatreng a tul a ni tih chu theihnghilh ngailo turin a chah a. A pawimawh ber chu a hmangtu chhungkuaah innghatin, tampui ni lo mah se bul tan nan, kan hmang thei a ni tih hria in taimakna, tumruhna nen hlawhtlinna a neih theih tih hria a, Pathianin hun tha min pe ang a, chu hun tha min pek ah chuan beiseina nen, harsatna lian tak tak state sum pawh penna tur, rinloh lam atanga lo thleng tawhlo turah te ngaiin, vawiin hi a bul tanna a ni tih hria a, heihi a tawpna ni dawnlo tih rilru pu in leh financial Year thar ah engemaw zat kan in thlang leh tura beisei zelin hma lam thlir turin mipuite a chah a ni.

Minister chuan Family Oriented SEDP kaltlanga Sericulture Department hnuaia beneficiary mi 5 leh AH & Vety Department hnuai a beneficiary mi 5 te hnenah assistance a hlan nghal a. Anni bakah hian Minister chuan Hnahthial District huam chhunga zirna lama hlawhtling leh ti tha a hnuaia mi pali te lawmpuina citation a hlan nghal a ni.
1. Zarzoliani
2. Rohluzuali
3. PC Zarchhuanawma
4. Saidingliana Sailo

Hnahthial District chhungah hian South Tuipui Constituency 1 a awm a, khaw 22 a huam a ni. Heng khua atang te hian Family Oriented Beneficiary 1500 an awm a, khaw 22 zingah Thingsai khua atangin beneficiary an tam ber a, mi 160 an awm a, a dawtah Cherhlun khua niin beneficiary mi 159 an awm bawk a. Khaw thenkhat- Denlung, Lungleng South, Ngarchhip, New Kawnpui ah te chuan beneficiary mi 20 an tling lo thung a ni. Hnahthial District ah hian tun dinhmunah AH&Vety Department hnuaiah beneficiary an tam ber a, mi 649 an awm a, Agriculture Department in dawtin beneficiary mi 253 an awm a. Commerce and Industries Department hnuaiaha beneficiary mi 236, Horticulture Deparment ah 221, Fisheries Department ah 52, leh Land Resourses ah 46 leh Sericulture Department ah 21 leh UD&PA hnuaiah beneficiary mi 22 an awm mek a ni. Hemi bakah kum 2020-21 chhubgin SEDP hnuaiah Deparment 5 ah pilot project lokal pui tawh a ni.

Pu J. Malsawmzuala Vanchhawng, Member, State Commision for Protection of Child Rights pawhin thu sawiin SEDP hi socio development lai thlur tela duan a nih thu a sawi a. Hemi hlawhtlin nan vantlang nun nuam a siam chu Commision for Protection of Child Rights tum niin, hemi ti hlawhtling tur chuan naupang nun venhim leh an chanvo humhalh sak a ngai a ni a ti a. Commision chuan naupang humhimna kawngah hma hrang hrang la in, India dan in a lo phut angin naupang dan bawh chhia an lo awm pawhin a hran a enkawl dan tur duan chhuah a ni a, an chunga rorel fel dan te tarlangin, naupang te hrem lo a, kaihhruai that theih an ni tih chu Act hrang hrangah a awm thu a tarlang a. Heng khawtlang nun siam that hi SEDP ah hian a tel vek a ni tih thu a sawi.

Minister hi Pu Lalthanliana, Member, Vety & Fishery Board; Pu LT Kima Fanai, Member, Commerce & Industries Development Board; Pu J. Malsawmzuala Vanchhawng, Member, State Commision for Protection of Child Rights; Pu V.Lallungmuana, Member, Commerce & Industries Development Board leh midangten an tawiawm a ni.

He huna lokal khawm zawng zawng lawmna thu, Hnahthial DC Pu R. Lalremsanga hnen atangin ngaihthlak a ni a, Additional DC leh District Level SEDP Committee Member Secretary ni bawk Pi Saizikpuii hnen atangin Report on SEDP, Hnahthial District ngaihthlak a ni bawk.

District Level SEDP Committee Member Pu F. Laldinthara chuan lawmthu sawiin he hun hi a khar a ni.