1787/2022-2023

Champhai, the 1st September, 2022: Chaw tha leh hrisel ei inzirtir uar thla, Poshan Maah - Nutrition Month, 2022, September thla chhunga kalpui tur chu vawiin khan ICDS Project Champhai chuan hawngin a kalpui tan.

Poshan Maah hawnna hun CDPO Office tual, Champhai Zotlanga neih hi Pu Lalruatmawia Ralte, CDPO Champhai chuan a kaihruai a. Pu Vanlalchhuanliana, BDO Champhai chuan Poshan Maah - Nutrition Month hi a hawng a. He hunah hian hriselna, ei leh in tha leh faina ngaipawimawha theihtawp chhuah tur leh midangte zirtir chhawng zel tura intiamna neih a ni a. Poshan Maah hawnna hun neih a nih zawh hian Poshan Rally Flag, Banner leh Poster-te kengin inzirtirna kawngzawh huaihawt a ni.

Poshan Maah (Nutrition Month) hi Poshan Abhyiaan (Nutrition Mission) hnuaiah kum tin India ram hmun hrang hrangah September thla chhungin hman thin a ni a. Poshan Maah kaltlang hian Poshan Abhyiaan thiltum hrang hrang - naupang kum 6 hnuai lam thanthu ven, naupangin ei tur tha an mamawh ang tawk ei tur an hmuh loh avanga rihna zang lutuk tih hniam, naupang kum 6 hnuai lam, hmeichhe tleirawl leh nu hote zinga thisen tlakchhamna, anaemia awm thin tih hniam leh naupiang hlim buk zang lutuk awm thin tih hniam tumin mipui vantlangah a zau thei ang bera zirtirna leh inhrilhhriatnate buatsaih thin a ni.